Әлмәт һөнәри көллияте студент-автомобильчеләр арасында «Автосессия – 2024» республика машина йөртү осталыгы конкурсының шәһәр этабында җиңү яулады
2024 елның 11 сентябрендә Әлмәт ДОСААФ автомәктәбе базасында студент-автомобильчеләр арасында «Автосессия – 2024» республика машина йөртү осталыгы конкурсының шәһәр этабы узды.
Конкурс Россия Эчке эшләр министрлыгының Әлмәт районы буенча Юл хәрәкәте иминлеге дәүләт инспекциясе, «Юл хәрәкәте иминлеге» дәүләт бюджет учреждениесенең Әлмәт шәһәрендәге территориаль идарәсе һәм ТР «ДОСААФ» автомәктәбе тарафыннан үткәрелде.
Әлеге чараның максаты: яшьләр арасында юл хәрәкәте кагыйдәләрен белүне ныгыту; югары уку йортлары студентларын һәм махсус урта уку йортларында укучыларны юл хәрәкәте иминлеген пропагандалауда катнашуга җәлеп итү; яшь йөртүчеләрдә юлда җаваплылык хисе формалаштыру.
Катнашучыларга түбәндәге этапларны узарга кирәк иде:
1. «Автомобильне техник карау»
2. «Юл хәрәкәте кагыйдәләрен белүчеләр»
3. «Автомобильне фигуралы йөртү»
Барлык этапларны узу йомгаклары буенча җиңүче билгеле булды - Әлмәт һөнәри көллияте командасы.
Икенче урында – Әлмәт политехник техникумы.
Өченче урын - «ТИСБИ» Идарә университетының Әлмәт филиалы
«Юл хәрәкәте кагыйдәләрен белүчеләр» номинациясендә Әлмәт политехник техникумы студенты Солтанов Тимур һәм «Автомобиль фигуралы йөртү» номинациясендә Әлмәт һөнәри көллияте студенты Сәлахов Риназ иң яхшы итеп билгеләнде.
Барлык катнашучыларга да истәлекле бүләкләр тапшырылды.