Әлмәт язучылары укучылар белән аралаша

8 нче октябрь көнне Әлмәт шәһәренең 1 нче мәктәбендә укучы икенче сыйныф укучыларының Әлмәт язучылар оешмасы җитәкчесе, язучы Илүсә Нәбиуллина белән очрашуы булды. Очрашуда язучы Әлмәт язучылар оешмасының 50 еллык юбилее уңаеннан балаларга Әлмәттә яшәп иҗат итүче язучылар турында сөйләде. Балалар да очрашуга шагыйрә Клара Булатованың, Зәлидә Зарипованың шигырьләрен ятлаганнар иде. Кунак апаларына сәнгатьле итеп шигырь сөйләп күрсәттеләр. Соңыннан Илүсә Нәбиуллинаның күптән түгел чыккан “Мин бит сине яратам” дигән балалар өчен язылган китабы белән танышу булды. Яңа китаптан өзекләр укылды.

10 нчы октябрь, җомга көнне Бөгелмә шәһәрендә Әлмәттә яшәп иҗат итүче язучылар бөгелмәлеләр белән очрашу уздырдылар. Мондый очрашу хәзер традициягә әверелде. Һәр ел саен 15 октябрь– Хәтер көне алдыннан Бөгелмә шәһәрендә эшләп килүче “Моңсар” әдәби берләшмәсе, “Бөгелмә авазы” газетасы белән берлектә Әлмәт язучыларын кунакка чакыра.Быелгы очрашу 15 нче октябрь – Хәтер көненә һәм Әлмәт язучылар оешмасының 50 еллык юбилеена багышланган иде.

Очрашуда шулай ук Лениногорск шәһәреннән дә кунаклар бар иде. Язучы Әсгать Салаховның, Илүсә Нәбиуллинаның, шагыйрә Минзифа Әхмәтшинаның чыгышлары Бөгелмә шәһәре үзешчән артистлары чыгышы белән үрелеп барды. Очрашу бик җылы һәм күңелле узды.

11 нче октябрь көнне Риза Фәхретдин исемендәге гимназиядә Корбан Гаете алдыннан бәйрәм булды. Анда язучы Илүсә Нәбиуллина, шагыйрә Минзифа Әхмәтшиналар катнашты. М.Әхмәтшинаның мөнәҗәтләр укуы бәйрәмгә нур өстенә нур булды.

Бәйрәмне сыйныф җитәкчеләре Әнис Шәмсуллин җитәкчелегендә 5 сыйныф укучылары һәм әти-әниләр оештырган иде.

Бәйрәм барышында гимназия укучыларына дин өлкәсенә кагылган сораулар белән викторина, төрле ярышлар уздырылды. 5 нче сыйныф укучылары үзләренең тәрбияле булуларын һәм һәряктан белемнәрен күрсәттеләр.

Бәйрәм төрле нигъмәтләр белән сыгылып торган табын артында дәвам итте. Балаларга тәмле бүләкләр таратылды.

Илүсә Нәбиуллина,
Әлмәт язучылар оешмасы җитәкчесе