«Татарстан-Кавказ: безне легендалар якынайта»

Әлмәт татар дәүләт драма театрының "Гашыйк Кәриб" спектакле Татарстан, Россия, чит ил фестивальльләрендә катнашкан, театр тарихында иң күп мактау-бүләкләр алган сәхнә әсәре. 1 октябрьдә артистлар әлеге спектакль белән чираттагы сәфәрдә - Дагестан республикасында булып кайттылар. Әлеге уңайдан, 16 октябрь көнне театр җитәкчелеге һәм артистлары журналистлар белән очрашып, сәфәрдән алган тәэсирләре белән уртаклаштылар.

Әлмәт татар дәүләт драма театры директоры Фәридә Исмәгыйлева труппаның Ногай районы, Махачкала һәм Дербент театраль сәхнәләрендә чыгыш ясауларын, әлеге сәфәрнең “Татарстан-Кавказ: безне легендалар якынайта” Россия проекты кысаларында тормышка ашырылуына бян итте.

-Кавказ якларына барып, биредә яшәүчеләрнең милли культурасы һәм мәдәнияте белән якыннан танышуыбызга, шушы халыкка үзебезнең иҗатыбызны бүләк итә алуыбызга без бик шат. Үзара дуслык җепләрен ныгытып, илһамланып кайттык. Кавказда яшәүче халыклар үзләренең тарихын, телләрен, әби-бабаларыннан калган гореф-гадәтләрен кадерләп саклап, буыннан-буынга тапшырып килүче бик кунакчыл халык. Ногай дәүләт драма театрында, Дербенттагы Лезгин һәм Тат театрларында, Махачкаладагы Авар һәм Кумык театрлары сәхнәләрендә артистларыбызның чыгышын алар шул дәрәҗәдә яратып кабул итеп, көчле алкышларга күмделәр. Чыннан да, артист халкы башкаларның мәдәниятен күреп, аңлап, шул рухны иңдереп яшәгәндә генә иҗади яктан камилләшә, әйләнә-тирә мохиткә яңача караш ташлый башлый икән, - дип, фикерләре белән уртаклашты Фәридә Бәгыйзовна.

Баш режиссер Ильяс Гәрәев Дагестан тамашачыларының ихлас булуын билгеләп узды, мондый сыйфат Әлмәт тамашачыларында да ешрак чагылсын иде, дигән теләген белдерде. Артистлар үзләренең күңелләрендә тирән эз калдырган истәлекле вакыйгалары, һәм тәэсирләре белән уртаклаштылар.

Шуны да хәбәр итеп узарга кирәк, Әлмәт татар дәүләт драма театрының бер төркем артистлары 18-23 октябрьдә Актаныш якларына юл ала. Алар тамашачыларга Илгиз Зәйниевнең “Сагынуларга ни чара?” исемле мелодрамасын күрсәтәчәк. Гастроль Актаныш ягыннан булган Татарстанның атказанган артисты Дилбәр Әбүнәгыймова, артистка Асия Харисова, музыка бүлеге җитәкчесе Гөлсөяр Хөсәеноваларны якташлары белән очраштыру-таныштыру максатыннан оештырыла. Татарстанның халык артисткасы Сәкинә Минханованың юбилее 31 октябрьдә узачак.

-Ноябрь аенда театрда яңа спектакльгә әзерлек башлана. Уильям Шекспирның атаклы “Ромео һәм Джульетта»сын режиссер Искәндәр Сакаев куячак. Әлеге спектакльнең премьерасы декабрьгә планлаштырылган. Декабрь аенда Татарстанның халык артисты Раушания Фәйзуллинаның да юбилее көтелә. Гомумән планнарыбыз зурдан, халык, аеруча әлмәт тамашачысы өчен иҗат итүебезне, репертуарыбызны яңарту, баету өстендә эшләвебезне дәвам итәбез. 2014 ел безнең театр өчен олуг юбилей елы. Шуңа күрә дә планнарыбыз шактый. Тамашачыларыбызны үзебезнең иркен матур залларда көтеп калабыз!- дип, йомгак ясады очрашуга театр директоры.

Резеда Исмәгыйлева, “Альметьевский вестник”