Бюджет үтәлеше - социаль йөкләмәләрне үтәү нигезе
22 июльдә Әлмәттә район Советы һәм шәһәр Советының чираттан тыш уртак сессиясе булды.
Район башлыгы Тимур Нагуманов рәислегендә узган утырышта район һәм шәһәр Советы депутатлары, шәһәр прокуроры, шәһәр суды рәисе, контроль-күзәтчелек органнары хезмәткәрләре, Совет һәм Башкарма комитет җитәкчеләре, массакүләм мәгълүмат чаралары катнашты.
Уртак сессиянең көн тәртибенә 4 мәсьәлә чыгарылды. Аларның иң мөһиме-Әлмәт муниципаль районының 2024 елга һәм 2025 һәм 2026 елларның план чорына бюджеты турындагы карарына үзгәрешләр кертү, шулай ук Әлмәт шәһәренең шул чорга бюджеты турында ТР ӘМР Финанс-бюджет палатасы рәисе Зөлфия Шәйдуллина сөйләде.
Әлмәт муниципаль районының берләштерелгән бюджеты үтәлеше 2024 елның 1 июленә үз керемнәре буенча 2 104 млн сум яисә еллык планның 55,3 процентын тәшкил итте.
Кергән керемнәр һәм ел башына бюджетта калган акчалар күчереп исәпләнгән хезмәт хакын тулысынча түләргә һәм планлаштырылган чыгымнарны финансларга мөмкинлек бирде. Муниципаль учреждениеләр буенча срогы чыккан кредит бурычы юк.
50,5 млн сум - Татарстан Республикасы бюджетыннан кире кайтарылмый торган акчалар нигездә җирле әһәмияттәге мәсьәләләрне хәл итүгә, гражданнарның үзара салым акчаларын җәлеп итүгә, шулай ук хезмәткәрләргә, социаль һәм мәдәни өлкәнең яшь белгечләренә, тренер-укытучыларга, спортчыларга һәм инструкторларга ярышларда алган нәтиҗәләре өчен түләүләргә юнәлдереләчәк.
Аннары Әлмәт шәһәренең участок сайлау комиссияләренең резерв составына кандидатуралар турындагы проектлар һәм район Советы Регламентына үзгәрешләр кертү белән ӘМР Советы Аппараты җитәкчесе Роза Әфләтунова таныштырды.
Сессия азагында иң алдынгы хезмәткәрләрне ведомство һәм тармак бүләкләре белән бүләкләү тантанасы булды.