“Яшь хәбәрче мәктәбе” кабаттан ишекләрен ачты

“Кадрлар барысын да хәл итә” дигән канатлы сүзләр, кайсы гына өлкәне алсаң да бердәй кагыла. Шундый ук хәл журналистикада да күзәтелә. Әлеге сирәк һөнәр ияләрен әзерләү, гомумән” талантлы балаларны эзләп табу, аларның яза, сөйли белү сәләтен үстерү кызыклы һәм кирәкле эш. Бу вәзгыятәне ачык аңлаган хәлдә, 1997 елдан башлап нәшер ителгән “Яшьләр заманы” һәм “Молодежный меридиан” газетасы базасында 15 ел дәвамында “Яшь хәбәрче мәктәбе” эшләп килде. Агымдагы ел башында, басманың “ Альметьевский вестник” газетасы булып үзәрүе һәм башка оештыру мәшәкатьләре белән әлеге эш бер ара тукталып торса да, без үзебезнең алга куйган бурычларыбызны , максатларыбызны онытмадык.

Район җитәкчелегенең рөхсәте белән,“Альметьевский вестник”–“ Әлмәт хәбәрләре” газетасы каршысында “Яшь хәбәрче мәктәбе” кабаттан үзенең эшчәнлеген башлап җибәрде. 9 октябрь көнне редакциябездә әлеге мәктәпнең беренче утырышы булды. Тәҗрибәбезгә таянып, мәктәп һәм югары уку йортларынын каләм тибрәтергә сәләтле, журналистика белән кызыксынган, фоторепортажлар, сайт белән эшләү теләге булган балаларны гына чакырган идек. 1 нче гимназия, 1 нче лицей-интернат, 1 нче, 17 нче мәктәп укучылары, Әлмәт дәүләт муниципаль хезмәт институты, Политехника техникумы студентлары беренчеләрдән булып бу мәктәптә укырга теләк белдерделәр.

Очрашуны газетаның баш мөхәррире Ландыш Зарипова башлап җибәрде. Ул кызыксынып, вакыт табып килгәннәре өчен укучыларга, аларның укытучыларына рәхмәтен белдерде, кыскача гына “Яшь хәбәрче мәктәбе”нең тарихына тукталды.15 ел дәвамында әлеге мәктәп күп кенә яшьләрнең олы юл башы, зур тормышка, ижтимагый эшчәнлеккә этәргеч булды. Кайчандыр газетаның даими хәбәрчеләре булган егет-кызларыбыз хәзер инде районда гына түгел, республикада да шактый танылган кешеләр.

Ландыш Нәгыймулловна очрашуга килгән яшьләргә газета , аның тоткан кыйбласы, “ Алтын каләм”– “Золотое перо” республика фестивале, төрле бәйгеләрдә катнашу мөмкинлеге турында сөйләде, журналистика факультетына укырга керергә теләгән яшьләр белән индивидуаль шөгыльләнү мөмкин булуын ассызыклады.

Очрашу әңгәмә, фикер алышу формасында дәвам итеп, түгәрәк өстәл артында сөйләшүгә кайтып калды. Без яшь хәбәрче мәктәбе укучылары белән киләчәк планнар, дәресләрнең алып барылу формасы һәм тәртибе, яшьләр матбугатында күтәрелергә тиешле тема һәм проблемалар хакында сөйләштек.

“Сез кайда гына, кем генә булып эшләсәгез дә, яза белү, фикереңне төгәл, кыска итеп әйтү һәм язу осталыгы һәрвакыт кирәк. Шуңа күрә дә. кызыксыныгыз, килегез, өйрәнегез. Без бу эштә сезнең беренче остазларыгыз, ярдәмчеләрегез булырбыз, – диде баш мөхәррир укучыларга мөрәҗәгать итеп.

Фәрдия Хәсәнова, “Альметьевский вестник” газетасы