Муниципаль хезмәткәрләрнең II спартакиадасы зона этабына йомгак ясалды

2 көн дәвамында республиканың 9 районыннан килгән муниципаль хезмәткәрләр иң көчле команда исеме өчен көч сынашты. Аларга спортның җиде төре: волейбол, мини-футбол, баскетбол, җиңел атлетика, өстәл теннисы, бадминтон, шахмат буенча көч сынашырга туры килде.

Нефтьчеләр башкаласының балалар һәм яшүсмерләрнең футбол буенча спорт мәктәбендә узган зона этабын ачу тантанасында Әлмәт районы башлыгы Мәҗит Салихов та катнашкан иде.

Спартакиаданың беренче көнендә командалар бадминтон, волейбол, җиңел атлетика, якшәмбедә шахмат,өстәл теннисы,баскетбол буенча ярыштылар. Ярышларда Казанда узачак финал уеннарына баручылар ачыкланды.

Киеренке көрәштән соң урыннар түбәндәгечә бүленде: өченче урында Сарман районы, әлмәтлеләргә беренчелекне алу өчен бары берничә балл гына җитмәде. Безнекеләрнең гомуми команда зачетында 2 –беренче, 4– өченче, 1– бишенче урын исәпләнә. Шулай итеп, Әлмәт районы – икенче, Түбән Камалар– беренче урында.

Ф.Хәсәнова