Корбан чалуга әзерлек башланды

Татарстан, шул исәптән Әлмәт мәчетләрендә дә Корбан бәйрәменә әзерлек башланды.

4 октябрь көнне,башкарма комитетның зур залында авыл башлыклары, район һәм шәһәр мәчетләренең имамнары, корбан чалу урыннары өчен җаваплы службалар катнашында киңәшмә булып узды. Аны район башлыгы Мәҗит Салихов алып барды.

Быел Корбан гаете 15 октябрьгә туры килә. Корбан бәйрәме, Ураза бәйрәме тәмамлангач 70 көн узуга, Зөлхиҗҗә аеның унынчы көнендә билгеләнә. Корбан гарәп теленнән якынаю, “Аллаһы Тәгаләгә якынайта торган әйбер” дип тәрҗемә ителә.Шәригать билгеләмәсендә исә корбан “гыйбадәт нияте белән билгеле бер шартларга туры килгән хайванны махсус вакытта Ислам кагыйдәләре буенча чалу” дигәнне аңлата. Корбан бәйрәме мөселманнарның иң зур бәйрәме булып санала. Казыйлар быел корбан чалу өчен нисабны көмеш бәясеннән хисаплаганда 12 мең сум күләмендә итеп исәпләргә тәкъдим иттеләр.
ТР Президенты Указы нигезендә Корбан бәйрәме ял көне булып санала.

Корбанны Зөлхиҗҗәнең унынчы көнендә (15 октябрьдә), шулай ук 11 нче яисә 12 нче көннәрендә (16 һәм 17 октябрьдә) чалырга ярый. 17 октябрьдә корбанлык кояш баеганчы - ахшам намазы кергәнче (17.38), чалынырга тиеш.

Корбан чалдырырга теләүчеләр корбанлык терлек сорап мәчетләргә мөрәҗәгать итә ала.15 октябрь көнне барлык мәчетләрдә дә бәйрәм намазы укыла. 7.30 да Үзәк мәчет яныннан корбан чалырга теләүчеләр «АПОПАТ» һәм Әлмәт троллейбус идарәләре автобусларына утырып корбан чала торган мәйданга бара алачаклар. Транспорт даими йөреп торачак.

Фәрдия Хәсәнова, “Альметьевский вестник” газетасы