Өлкәннәр игътибар үзәгендә

1 октябрь – Өлкәннәр көне уңаеннан һәрбер предприятие, оешма үз ветераннарын хөрмәтли. Әлеге матур традиция Әлмәт районының ЗАГС идарәсендә дә катгый саклана. Олы дәүләтнең кечкенә бер ячейкалары булган гаиләне теркәүче, беренчеләрдән булып аларга хәер–фатиха бирүче, гражданлык актын теркәү идарәсе тәрбия чарасы буларак та аның мөһимлеген ачык аңлый. Бәйрәм уңаеннан ЗАГС директоры Резеда Заһретдинова нефтьчеләр башкаласында беренчеләрдән булып Никахлашу сараен ачкан, аны җитәкләгән мөхтәрәм ветеран Асия Фахрулловна Закированы котлады. Район башлыгы Мәҗит Салихов һәм коллектив исеменнән тәбрикләп, “Әлмәт шәһәренең 60 еллыгы” юбилей билгесен тапшырды.

“ Хезмәтләрегез, эшкә булган мөнәсәбәтегез безнең өчен үрнәк. Сез ЗАГС идарәсенең иң мөхтәрәм ветераны. Киләчәктә дә сәламәт булып, Нәкыйп абый белән тигезлектә гомер кичерегез”– диде ул үзенең чыгышында.

Асия Закирова Казан Дәүләт педагогия институтының тарих һәм филология факультетын тәмамлаганнан соң юллама белән Әлмәткә кайта. Интернат – мәктәптә 14 ел эшләгәннән соң һәр эшкә иҗади якын килеп эшләүче белгечне, ул чорларда халык арасында бик популяр булган радиотапшыруларның редакторы һәм алып баручысы, танылган шагыйрә Саҗидә Сөләйманова аны үз урынына калырга күндерә. Шулай итеп , 1974 елда Асия Фахрулловна педагоглыктан журналистикага күчә. Кайда гына эшләсә дә үз хезмәтен яратып, күңел биреп, башкалар өчен дә кызыклы булырлык итеп башкара белә ул. Әлеге ханымның тырышлыгы, һәр яктан сәләтле булуы район җитәкчелеге игътибарыннан да читтә калмый. 1978 елда Асия Закирова Әлмәттә беренче ачылган Никахлашу сараена мөдир итеп билгеләнә. Учреждениенең эшчәнлеген оештыру, яшьләрдән гаризалар кабул итү, алар белән әңгәмәләр кору, табиплар белән лекцияләр алып бару, гражданлык актын теркәү тантанасын үткәрү– бар да аның берүзенә тапшырыла.

– Үз эшемне бик яратып башкардым. Яшьләрнең беренче гаилә бәйрәме онытылмаслык булсын өчен күп әдәбият укып, үзем сценарийлар, шигырьләр чыгара идем, – дип искә ала ул вакытларны Асия ханым. Никахлашу сараенда 11 ел мөдир булып эшләү дәверендә аның хезмәтләре тармак министрлыгының Мактау грамоталары белән билгеләп үтелә. Россия буенча уздырылган бәйге җиңүчесе буларак Ригада узган укуларда да катнаша.

Хезмәте белән генә түгел, тормышка, яшәешкә булган мөнәсәбәте белән дә күпләргә үрнәк Асия Закирова узган юл. Тормыш иптәше Нәкыйп Салихович белән 52 ел тигез, матур гомер кичереп, ике бала тәрбияләп, хәзер инде оныклары һәм оныкчыкларының кадер – хөрмәтен тоеп яшиләр алар.

Фәрдия Хәсәнова, “Альметьевский вестник” газетасы