Мәҗит Салихов ветераннар активын Өлкәннәр көне белән тәбрикләде

Бүген Яшьләр үзәгендә Өлкәннәр көненә багышланган чара булып узды. Залга җыелган ветеран оешмалары активистларын сәламләргә Әлмәт муниципаль районы башлыгы Мәҗит Салихов һәм ТР Куркынычсызлык Советы секретаре Валерий Власов килгән иде.

Мәҗит Салихов үзенең чыгышында илебез азатлыгы өчен көрәшкән, тылда , сугыштан соңгы авыр елларда үз– үзләрен аямыйча хезмәт иткән, нефть башкаласы төзелеше, аның сәнәгый потенциалын үстерүдә катнашкан мөхтәрәм өлкән буынга үзенең рәхмәт сүзләрен җиткерде.

– Безнең максатыбыз – ветераннарның тормыш һәм яшәеше өчен уңайлы шартлар булдыру. Торак төзелеше программасы буенча 537 ветеран яңа фатирлар алды. “Һәркемгә уңайлы мохит” программасы уңышлы тормышка ашырыла. Өлкәннәр өчен авыл хуҗалыгы ярминкәләре уздыру матур традициягә әверелде. Без үз алдыбызга бер генә ветеран, бер генә өлкән буын кешесе дә игътибарсыз калырга тиеш түгел дигән бурыч куябыз,– дип билгеләп узды район башлыгы. Бәйрәмдә каланың социаль – икътисади үсешенә лаеклы өлеш керткән ветеран– активистлар “Әлмәт шәһәренә 60 ел” юбилей билгеләре белән бүләкләнде. Ветеран оешмалары арасында уздырылган Спартакиада җиңүчеләре ,шулай ук” Совет һәм башкарма комитетның Мактау грамоталарына лаек булдылар.

Татарстан Республикасы Президенты Рөстәм Миннеханов, Дәүләт Советы Министрлар Кабинеты һәм шәхсән үз исеменнән әлмәтлеләрне Валерий Власов тәбрикләде.

Чарада өлкән буынга адресланган бик күп тәбрикләү сүзләре һәм теләкләр яңгырады. Бәйрәм концерт программасы һәм Сәламәтлек саклау комбинатында әзерләнгән чәй табыны артында дәвам итте.

Л.Сибгатуллина , Ф.Хәсәнова