“Туй” спектакленең тагын бер җиңүе

Самара шәһәрендә I регионара “Театраль Идел” фестивале төгәлләнде. Идел буе шәһәрләре ассоциациясе, Самара Театр әһелләре берлеге һәм Самара шәһәр округы администрациясе уздыра торган бу фестиваль әле беренче тапкыр оештырыла. 15енче сентябрьдән 23 енә кадәр булып узган фестивальдә Казан, Саратов, Волгоград, Ульяновск, Тольятти, Саранск, Түбән Новгород, Пенза, Саратов шәһәрләреннән килгән театрлар 14 спектакль күрсәтте.

Әлмәт драма театры фестивальдә Б.Брехтның “Туй” (Мещанская свадьба) спектакле белән катнашты һәм ике номинациядә җиңү яулады. Кияүнең Дусты образын башкарган Динар Хөснетдинов “Икенче пландагы ир-ат образын иң яхшы башкаручы” номанациясендә бүләкләнде. Динар яшь артист, театрда өченче сезонын эшли. Әлмәткә Казан театр училищесын тәмамлап килде. Спектакльнең режиссеры Искәндәр Сакаев “Иң яхшы режиссер эше” номинациясендә җиңүгә лаек булды. Искәндәр татар театры дөньясында инде билгеле иҗатчы. Аның Әлмәт театрында куйган «Гашыйк Кәриб» спектакле Татарстан, Россия күләмендә күп фестивальләрдә катнашып җиңү яуларга өлгергән иде инде.

Әнисә Таһирова