“Наркотикларсыз тормыш” айлыгы дәвам итә

Татарстан Республикасында хәзерге вакытта наркологик диспансер хисабында 17 меңнән артык наркотик кулланучы күзәтүдә. Республикада наркотик кулланучылар елына 1-2 процентка арта. Вәзгыятьне уңай якка үзгәртү максатыннан, ТР прокуратурасы, хокук саклау органнары һәм шушы темага мөнәсәбәте булган барлык министрлыклар, ведомстволар тарафыннан республика күләмендә 16 сентябрьдән башланган “Наркотикларсыз тормыш” айлыгы игълан ителгән иде. 24 сентябрь көнне ТР Министрлар Кабинетында журналистлар белән узган видеобрифингта беренче атна йомгаклары игълан ителде. Очрашуда ТР прокуроры урынбасары Фәрит Заһидуллин һәм РФ Наркотиклар әйләнешен контрольдә тоту федераль хезмәтенең ТР буенча идарәсе башлыгы урынбасары Эдуард Гәрәев, Әлмәт бүлеге җитәкчесе , полиция полковнигы Айрат Шакиров, идарә җитәкчеләре һәм массакүләм мәгълүмат чаралары вәкилләре катнашты. Чыгыш ясаучыларныћ сүзләренә караганда, беренче атнада хокук саклау органнары наркотикларга мөнәсәбәтле 79 җинаять теркәлгән, шуларның 41е наркотик саклануына, 3се наркопритон оештыруга, 3се көчле тәэсир итә торган матдәләрнең законсыз әйләнешенә карый. Законсыз әйләнештән 37 килограммнан артык психоактив матдә тартып алынган, шуларның күпчелеге – марихуана, мисалга, узган ел республика буенча андый наркотик 6 килограмм чамасы гына алынган булган.

РФ Наркотиклар әйләнешен контрольдә тоту федераль хезмәтенең ТР буенча идарә хезмәткәрләренә “Мәк” операциясе барышында Тукай районында тикшергәндә берәү ферма янындагы яшерен урыннан 2 капчык марихуана алып биргән, аның авырлыгы – 3,2 килограмм. Шуның буенча хәзер җинаять эше кузгатылган.

“Наркотикларсыз тормыш” айлыгы республикада беренче тапкыр уздырыла. Аның беренче атнасында хокук сакчылары 62 административ протокол төзегән, шуларның 53е наркотик кулланган өчен, 4се андый матдәләрне законсыз саклаган һәм 2се җәмәгать урынында наркотик кулланган өчен. Оператив чаралар үткәргәндә чит ил кешеләренең миграция законнарын бозуның 18 очрагы ачыкланган. ТР буенча ЮХИДИ идарәсе хезмәткәрләре автотранспорт белән наркотик ташуны киртәләү һәм наркотик исреклегендә рульда йөрүчеләрне табу өчен максатчан эш алып баралар, дип билгеләп үтте ТР прокуроры урынбасары Фәрит Заһидуллин.

Наркотик чаралар, аларны ясау технологияләре турында белешмә биргән интернет челтәрендәге 2 сайт ачыкланып, шул хакта Роскомнадзорга хәбәр ителгән. Тикшерү белән барып, медицина учреждениеләренең һәм аптекаларның 4сендә прекурслар әйләнеше бозылуы ачылган һәм шулар буенча тикшерү эшләре бара.

17 сентябрь көнне “Наркотикларсыз тормыш” айлыгы кысаларында республика буенча гражданнарны бердәм кабул итү көне үткәрелде. Очрашулар бер үк вакытта 7 муниципаль районда уздырылып, 42 кеше кабул ителгән. Күп кенә сораулар сәламәт яшәү рәвешен пропагандалау, наркопритоннар, наркотик куллануны пропагандалаучы сайт һәм информацион материалларны чикләү хакында барды.

Акция кысаларында хокук саклау органнарына 27 мөрәҗәгать кергән. Аноним хатлар өчен куелган ящиклардан 10 хат алынып, тикшерү эшләре башланган.

Наркотиклар сату, әлеге матдәләр белән бәйләнешле мәгълүматларыгыз булганда, “кайнар линия”ләргә шалтыратырга мөмкин:
ТР прокуратурасы - (843) 291-19-25;
Наркотиклар әйләнешен контрольдә тоту идарәсе - (843) 273-43-45;
Әти–әниләр өчен ышаныч телефоны:
( тәүлек дәвамында) 8-800-200-01-22;
Психологик ярдәм ышаныч телефоны– (843) 277-00-00, 277-41-80;
Суицид буенча “кайнар линия” телефоны (тәүлек әйләнәсендә) – (843) 279-55-80, 279-55-56.