Әлмәттә авыл хуҗалыгы товарлары ярминкәләре үтә

Элеккедән килгән гадәт буенча, көзне байлык, муллык ае, диләр. Хәзер инде кибет киштәләрендә яшелчә, җиләк –җимешнең мең төре ел әйләнәсе сыгылып торгач, бәлки бу дөреслеккә туры да килеп бетми торгандыр. Шулай да, сентябрь ахыры, октябрь башларында авыл хуҗалыгы товарлары ярминкәсе оештыру ике як өчен дә отышлы дип санала. Бер як дигәнебез, совет чорларында бүлеп бирелгән бакчаларын су юклыктан ташлап китәргә мәҗбүр булган өлкән яшьтәге әлмәтлеләр булса, икенче якта – авыл хуҗалыгы товарлары җитештерүчеләр.

Әлмәтнең “Западный” базарында узган атнада башланып киткән ярминкәләр 1октябрь - Өлкәннәр көне уңаеннан да оештырылды. Ярминкә берничә атна дәвам итә. 21 сентябрь көнне дә биредә иртәнге 8 дә үк халык җыелган иде. Алыпсатарлардан тыш бакчаларында, хуҗалыкларында үскән товарлары белән сату итүчеләрдә шактый күренә. Бәрәңгене Иске Суркино авылыннан һәм Сарманнан алып килгәннәр, 1 килосы 12 сум. Үз товарларын Әлмәт районы умартачыларыннан тыш, Оренбург якларыннан килүчеләр дә тәкъдим итте. Иң күп чират Токарликов хуҗалыгының ит сату павильоны янында булды. 1 килосы 205 сум чагыштырмача арзан бәягә керә.

Шунысы игътибарга лаек, әлеге ярминкәләрдә өлкәннәр өчен барлык уңайлыклар да тудырылган. Социаль яклау идарәсе хезмәткәрләре һәм Сәүдә – икътисад техникумы студентлары аларга товарларын өйләренә кайтарырга булышалар, әлеге эшләргә махсус машиналар бүленгән. Идарә хезмәткәрләре сүзләренә караганда шимбә көнне 25 өлкән кешегә хезмәт күрсәтелгән.

Фәрдия Хәсәнова, “Альметьевский вестник” газетасы