16 сентябрьдән “Наркотикларсыз тормыш” акциясе башлана

16 сентябрьдән 16 октябрьгә кәдәр республикада “Наркотикларсыз тормыш” дигән айлык уздырылачак. 13 сентябрь көнне башкарма комитетның зур залында наркотикларга каршы көрәш комиссиясенң чираттагы утырышында шул хакта игълан ителде. Аның эшендә башкарма комитет җитәкчесе урынбасары Василий Самойлов, Әлмәт шәһәре прокурорынң өлкән ярдәмчесе Игорь Нагаев, наркологик диспансерның баш табибы Сирень Халиков, мәктәп, урта һәм югары уку йорты җитәкчеләре, ТОСМС башлыклары, төрле служба вәкилләре катнашты.

Башкарма комитет җитәкчесе билгеләп узганча, район һәм шәһәрдә авыр наркотиклар белән тәэмин итү каналлары ябылган, шулай да киндер, мәк, яшүсмерләр арасында насвай куллану очраклары кимеми. Уку йортларында уздырылган тикшерүләр вакытында наркотик кулланучыларның ачыкланмавы, бездә бар да яхшы дигән сүз түгел, үзегезне алдаудан туктарга кирәк, дигән фикерне җиткерде ул залда утыручыларга.

Наркотикларга каршы күпме генә чаралар күрелсә дә, көрәшне кискенләштерү ихтыяҗы кимеми.

Сирень Халиков чыгышыннан күренгәнчә, район һәм шәһәрдә беренче тапкыр, стационар дәваланулардан соң наркотик кулланучылар саны республика күрсәткечләреннән шактый югары.

“Наркотикларсыз тормыш” акциясе турында Игорь Нагаев сөйләде. 16 сентябрьдә старт алачак акция кысаларында “Мәк –2013” оператив – профилактик операция уздыру, барлык белем бирү учреждениеләренә сәламәт яшәү рәвешен, наркотикларның зарарын күрсәтә торган агитацион плакатлар урнаштыру, фотокүргәзмәләр, рәсемнәр бәйгесе оештыру күздә тотыла. Төрле матбугат конференцияләре, хокук саклау, җирле власть органнары белән элемтә өчен “кайнар линия”ләр дә оештырылачак, халык күп җыела торган урыннарда видеороликлар, фонограммалар, листовкалар тарату каралган.

Фәрдия Хәсәнова, “Альметьевский вестник” газетасы