ТР Президенты Рөстәм Миннеханов Әлмәттәге юбилей чараларында катнашты

Бүген Әлмәт каласында ике зур бәйрәм, шәһәр оешуга -60, Татарстанда беренче нефть ятмалары эшкәртелә башлауга -70 ел тулу зурлап билгеләп үтелде. Юбилей чараларында Татарстан Республикасы Президенты Рөстәм Миннеханов, ТР Дәүләт Советы рәисе Фәрит Мөхәммәтшин, район башлыгы Мәҗит Салихов, “Татнефть” ААҖ генераль директоры Шәфәгать Тәхаветдинов, танылган спортчылар, Россия һәм күрше төбәкләрдән килгән мәртәбәле кунаклар катнашты.

Республика башлыгының иртәнге визиты нефтьчеләребез тарафыннан әлмәтлеләргә әзерләнгән тагын бер зур бүләк – “Яшьлек” микрорайонында 25 нче яңа мәктәпне ачу тантанасы белән башланды.

“Төзелеше, җиһазлануы белән дә иң югары таләпләргә җавап бирерлек мәктәп төзеп куллануга тапшыру, дистәләгән башка социаль объектлар “Татнефть”нең кара алтын табуны кешеләргә хезмәт итәрлек, технологик һәм икътисади планда грамоталы итеп оештыра белүен, компаниянең социаль ориентир алуын тагын бер кат раслый. Хезмәтегез өчен рәхмәт сезгә,-“ диде Президент үзенең чыгышында.

Проектны тормышка ашыру 2012 елның апрель аенда башлана, объектның гомуми бәясе 727, 5 млн сум. Укыту процессы өчен кирәк-яраклар алырга өстәмә рәвештә 40 млн сум бүленгән. Агымдагы уку елын “Яшьлек” микрорайонында яшәүчеләрнең балалары барлык уңайлыклары булган яңа мәктәптә каршылаячак.

Татарстан нефтенең 60 еллыгы исемендәге парк та Рөстәм Миннеханов игътибарыннан читтә калмады. Россиянең иң күркәм ял һәм күңел ачу үзәгендә Президент танылган нефтьчеләр аллеясын карады, кара алтын табучыларның һөнәри бәйрәмнәре уңаеннан нефть сәнәгатенең беренче министры Николай Константинович Байбаков бюстына чәчәкләр куйды.

Бәйрәм чараларының кульминацион өлеше, әлбәттә инде, үзәк мәйданда булды. Татарстанда беренче тапкыр кара алтын табу чорларыннан башлап, нефть сәнәгатенең бүгенге югарылыкка, инновацион технологияләргә нигезләнгән көчле компаниягә әверелүен чагылдырган мәдәни һәм видеокомпозиция узган җиде дистә гасырны күздән кичерергә мөмкинлек бирде. Нефть белән бергә туган, 60 еллык тарихы булган Әлмәтнең үсеш темплары, казанышлары да тамашачыларга видеоролик форматында тәкъдим ителде. Бәйрәм “ Татнефть” ААҖ составына кергән, шәһәрнең социаль – икътисади тормышында мөһим роль уйнаучы оешмалар, уку йортлары,спортта һәм иҗатта төрле биеклекләргә ирешкән коллективлар парады белән дәвам итте.

ТР Президенты Рөстәм Миннеханов, “Татнефть” ААҖ генераль директоры Шәфәгать Тәхаветдинов, Әлмәт муниципаль районы башлыгы Мәҗит Салихов әлмәтлеләргә, нефтьчеләргә һәм шәһәребез кунакларына үзләренең тәбрикләүләрен җиткерделәр.

Тантаналы өлеш тәмамлангач ипподромда ат чабышлары карарга, мәйданда республикабызның танылган артистлары Айдар Галимов, Гүзәл Уразова, РФ атказанган артисты Александр Маршалны тыңлап хозурланырга мөмкин иде.

Фәрдия Хәсәнова, “Альметьевский вестник” газетасы