“Күп милләтле Әлмәт” фестивале Республика көненә бүләк

Бүген – Республика көне. Татарстан Республикасының дәүләт суверенитеты турында Декларация кабул ителүгә 23 ел. Әлеге вакыйга республикабыз һәм, гомумән, Россия Федерациясе үсешенең яңа юнәлешен билгеләгән мөһим вакыйга булып тарихка керде. Быелгы бәйрәмнең Әлмәт шәһәренә -60, Татарстанда нефть ятмалары эшкәртелә башлауга -70 ел тулган юбилейлар чорына туры килүе аның әһәмиятен тагын да арттыра. Республика көне район һәм шәһәребезнең үзешчән сәнгать әһелләре тарафыннан да зурлап билгеләп үтелә. 30 август көнне калабызның үзәк паркындагы чаралар “Күп милләтле Әлмәт” дип исемләнгән фестиваль белән башланып китте. Нефть башкаласының милли диаспоралар коллективлары чыгышлары дуслык бәйрәменең матур бер үрнәге булды.

Фестивальне тантаналы рәвештә башкарма комитет җитәкчесе урынбасары Василий Самойлов ачты. Ул агымдагы елның истәлекле вакыйгаларга бай булуын, юбилей чаралары, Универсиада кысаларында күп төрле чаралар уздырылуын билгеләде.

– Бу безнең тарихыбыз. Район һәм шәһәребездә 60 тан артык милләт вәкилләре бердәм һәм дус булып, гореф – гадәтләрне санлап, хөрмәт итеп, уртак максатларга хезмәт итеп яшиләр. Әлеге бергәлек хезмәт нәтиҗәләрендә генә түгел, рухи һәм мәдәни тормышыбызда да чагыла. “Күп милләтле Әлмәт” фестивале шуның бер мисалы, - диде ул үзенең чыгышында. Артистларны һәм тамашачыларны район башлыгы Мәҗит Салихов исеменнән Республика көне һәм юбилейлар белән тәбрикләде, уңышлар теләде. Аеруча актив эшләүче диаспора җитәкчеләренә Совет һәм башкарма комитетның Мактау грамоталарын тапшырды.

Фестивальдә Әлмәт районы һәм шәһәрендә яшәүче диаспораларның тормыш–көнкүрешләре дә чагылдырылды. Паркның сәхнә тирәсендәге буш мәйданында әрмән, әзербайҗан, үзбәк, чуваш, керәшен халыкларының кулдан эшләнгән, теккән, чиккән эшләнмәләре дә куелган иде.

Милли диаспораларның үзешчән сәнгать коллективлары чыгышлары барыбыз да яратып өлгергән “Халыклар дуслыгы” композициясе белән башланып китте. Милли киемнәр, милли моңнарга уралган парк сәхнәсе уртак алкышларга күмелде. Рус җырлары халык ансамбле «Русские узоры», «Виринея» фольклор ансамбле, татар керәшеннәренең халык фольклор ансамбле «Кәләем», мордва халык ансамбле «Эрзянка», чуваш халык фольклор ансамбле «Асамат», мордва халык ансамбле «Мастор Ягида», Яшьләр бистәсе, Рус Акташы, Югары Мактама, Габдрахман, Яңа Кәшер, Яңа Нәдер, Миннебай һәм башка авыл клублары каршысында эшләп килүче үзешчән сәнгать коллективлары чыгышлары фестивальнең бизәге булды.

Халыклар дуслыгын чагылдыручы мондый чаралар үзешчән артистларның үзләренә дә бик ошый. “Бүгенге фестивальнең олы юбилейлар фонында уздырылуы без, артистлар өчен, җаваплылыкны тагын да арттыра. Бик теләп репетицияләргә йөрдек, уңышлы гына чыгыш та ясадык. Бүген менә искиткеч күңелле бәйрәм, тугандаш халыклар, коллективлар белән аралашабыз. Алардан нәрсәгәдер өйрәнәбез, чагыштырабыз. Күңелдә шатлык, илебез, шәһәребез өчен горурлык хисе,” - дип үзләренең тәэсирләре белән уртаклашты «Эрзянка” ансамбленә йөрүчеләр.

Фәрдия Хәсәнова, “Альметьевский вестник” газетасы