Әлмәттә Балаларны яклау көне үткәрелде
Бүген Әлмәттә Халыкара балаларны яклау көненә багышланган күпсанлы чаралар узды. Күңел ачу программасы иртәнге сәгатьләрдә нефтеградның берничә мәйданчыгында башланды.
13.00 сәгатьтә Татарстан нефтенең 60 еллыгы исемендәге шәһәр паркында «Бәхетле балачак» дигән тантаналы чара узды. Чараны ачып, АМР башкарма комитеты җитәкчесе Айдар Каюмов барлык балаларны һәм аларның ата-аналарын бәйрәм белән район башлыгы исеменнән котлады, Әлмәттә яшь талантларны ачу өчен барлык шартлар тудырылуын билгеләп үтте.
- Балачак-хыяллар тормышка ашкан һәр кеше өчен искиткеч, дөнья елмаю, игелек һәм бәхет белән тулы вакыт. Өлкәннәрнең бурычы - бу кыйммәтле вакытны мөмкин кадәр озынрак һәм яктырак итү, - дип ассызыклады ул.
Талантлы, акыллы, нефть башкаласын данлаучы иҗади балалар һәм укучыларны үстерүче педагогларга, остазларга, тәрбиячеләргә, әтиләргә, әниләргә, әби-бабайларга рәхмәт белдерде.
Балачак бәйрәме төрле муниципаль конкурсларда һәм ярышларда җиңүчеләрне бүләкләү белән дәвам итте. Җиңүнең 78 еллыгына багышланган «Фронт концерты» балалар иҗаты фестивале, «Сәләтле Әлмәт», «Җиңү маршы» хәрби техника макеты күргәзмәсе конкурсы лауреатлары лаеклы грамоталар алды.
Конкурсантлар һәм иҗат коллективлары катнашындагы концерт программасы бәйрәмнең бизәге булды.
Паркның бөтен территориясендә декоратив-кулланма иҗат, сынлы сәнгать, модельләштерү буенча мастер-класслар оештырыла.
Уен пятачкалары, спорт ярышлары, аттракционнар, күңел ачу интеллектуаль уеннары болар барысы да бәхетле Әлмәтнең тагын бер бәхетле көне булды.