9 нчы һәм 6 нчы мәктәпләр яңа уку елына әзер

 Быел шәһәрнең 10 мәгариф учреждениесе үзенең укучыларын капиталь ремонттан соң, яңартылган килеш каршылый. Әлмәт шәһәренә - 60, Татарстан нефтенә - 70 ел тулган юбилейлар елында бу калада яшәүчеләргә тагын бер зур бүләк. Район җитәкчелегенең тырышлыгы белән агымдагы елда республика программасын киң масштабларда үткәрергә мөмкинлек булдырылды.

20 август көнне республика программасы кысаларында капиталь ремонт ясалган 9 нчы һәм 6 нчы мәктәпләр ачылды. Әгәр тарихка күз салсак, 9 нчы мәктәп 1957 нче елда, шәһәр оешып 4 ел узуга, иске баракта үзенең эшчәнлеген башлап җибәрә. 1971 елда мәгариф учреждениесе өчен хәзерге бинаны төзеп куллануга тапшыралар. Чагыштырмача заманча биналардан исәпләнгәнлектән, мәктәпкә 42 ел дәвамында капиталь ремонт ясау мөмкинлеге булмый. Биредә 425 укучы белем ала, 1 нче сыйныфка 50 бала керәчәк. Әлеге коллектив 2013-2014 уку елын яңартылган бинада каршылаячак. 9 нчы мәктәптәге төзелеш эшләренең заказчысы "АИСК" ҖЧҖ, подрядчы оешма "Техно-Строй". Программада каралганча, биналарда 8 төрле эш башкарылган: түбә, тәрәзәләр, ишекләр, канализация, электр һәм су линияләре алмаштырылган, керү группалары ремонтланган. Башкарылган эш күләме 18 миллион сумлык.

Мәктәпне ачу тантанасында башкарма комитет җитәкчесе Марат Гирфанов катнашты. Ул үзенең чыгышында республика программасы кысаларында мәгариф учреждениеләрен капиталь ремонтларга мөмкинлек булуын, юбилейга "Татнефть" компаниясе ярдәме белән тагын бер яңа объект - - 25 нче мәктәп ачылачагын билгеләп узды. Булдырылган шартлар яшь буынга сыйфатлы белем бирүгә хезмәт итсен, дигән теләкләрен җиткерде. Марат Нилевич "АИСК" ҖЧҖ директоры Наил Миннәхмәтовка, "Техно-Строй" ҖЧҖ директоры Рәис Галләмовка һәм "Основа С" ҖЧҖ директоры Рөстәм Талиповка Совет һәм башкарма комитетның Мактау грамоталарын тапшырды. Эшчеләрнең хезмәтләре Рәхмәт хатлары белән билгеләп үтелде.

Җавап сүзе белән 9 нчы мәктәп директоры Наталья Мартышова һәм 6 нчы мәктәп директоры Анжела Шәрәпова чыгыш ясадылар. Алар мәктәпләргә капиталь ремонт үткәреп, укытучылар коллективы, укучылар өчен уңай шартлар булдырганнары өчен республика җитәкчелегенә, район башлыгы Мәҗит Салиховка, төзүчеләргә олы рәхмәтләрен җиткерделәр, ремонтланган мәктәпләрдә яңа көч, зур омтылыш белән нәтиҗәле хезмәт итәрбез, дип ышандырдылар.

Ачылу тантанасында республикабызның танылган артистлары Мөнир Рахмаев һәм Рафаэль Якуповның халыкка үзләренең җырларын бүләк итүләре бәйрәмне тагын да ямьләндерде.

Фәрдия ХӘСӘНОВА
«АЛЬМЕТЬЕВСКИЙ ВЕСТНИК» ГАЗЕТАСЫ