Язгы чәчү экваторны узып китте
Әлмәт муниципаль районында язгы чәчү шартлы «экватор»аша үтте. Авыл хуҗалыгы һәм азык-төлек идарәсе мәгълүматлары буенча, атна ахырына агропредприятиеләр тарафыннан иген чәчү 14,7 мең гектар мәйданда башкарылган, бу план йөкләмәсенең 50,2 процентын тәшкил итә.
Бүген район башлыгы Тимур Нагуманов АМР авыл хуҗалыгы һәм азык-төлек идарәсе җитәкчесе белән берлектә Н. Е.Токарликов исемендәге АҖ кырларында чәчү кампаниясенең барышын тикшерде.
Хуҗалыкта төрле культураларның чәчү мәйданы 7 мең гектардан артык. Язгы бөртекле культуралар чәчүдә 12 агрегат җәлеп ителгән, шуларның икесе - заманча Amazone Condor, алар стернага сыйфатлы чәчү өчен кирәкле борозда әзерләүне тәэмин итә. Шулай итеп, туфрак горизонтыннан дымны югалтудан саклану мөмкинлеге барлыкка килә, бу хәзерге һава шартларында бик актуаль.
Хуҗалык тулысынча минераль ашламалар һәм сыйфатлы орлыклар белән тәэмин ителгән, ягулык-майлау материаллары җитәрлек күләмдә сатып алынган. 2,5 мең гектар мәйданда чәчелгән көзге культураларның торышы төрлечә бәяләнә. Басуларның бер өлешендә бодай яхшы хәлдә. Үсемлекләргә дым җитмәгән кырлар бар.
Язгы бөртекле культураларны 4,1 мең га мәйданда чәчәргә планлаштыралар, бүгенге көндә 3,5 мең га бөртекле культуралар чәчелгән (планга карата 84% тан артык).
- Хәзер һәр ямьле көнне генә түгел, ә планлаштырылган күләмнәрне вакытында чәчү һәм соңыннан яхшы уңыш җыю өчен һәр сәгатьне кулланырга кирәк. Сез куелган бурычны үтәрсез дип ышанам, - дип ассызыклады Тимур Нагуманов аграрийларга мөрәҗәгать итеп.