Гаилә тарихында гасырлар кайтавазы: Әлмәттә шәҗәрәләр фестивале узды
1 мартта Әлмәт драма театры бинасында «Гаилә тарихында гасырлар кайтавазы – Тарихта эзлебез» республика шәҗәрәсе фестиваленең муниципаль этабы узды. Бәйгенең зона турына юллама өчен Әлмәт районының 4 династиясе көрәште: Әлмәт шәһәреннән Шәңгәрәев, Шарлам авылыннан Вәлиәхмәтов-Җәләевлар, Рус Акташыннан Фокиннар һәм Югары Акташтан Якуниннар.
Фестиваль программасы ике блоктан торды: милли һәм гаилә ризыклары күргәзмәләре, шәҗәрә презентациясе белән якты концерт номерын үз эченә алган гаиләнең визит карточкасы. Моннан тыш, һәр команда гаилә агачын әзерләде.
Район башлыгы исеменнән катнашучыларны Әлмәт муниципаль районы Советы Аппараты җитәкчесе Роза Әфләтунова сәламләде.
- Гаилә белән бәйле бар нәрсә-беренче чиратта, өй учагы, җылылык, ямь, игелек, мәхәббәт, гасырлардан килгән традицияләрне саклый һәм арттыра белү. Районыбызда шундый искиткеч хезмәт династияләре яшәүләре һәм хезмәт итүләре белән без чиксез шат һәм горурланабыз, - дип ассызыклады Роза Әфләтунова.
Ул шулай ук конкурсның жюри һәм оештыручыларына - Татарстан Республикасының Архив эше буенча Дәүләт комитеты һәм «Татарстан Республикасы Дәүләт архивы» дәүләт бюджет учреждениесенә буыннарның дәвамчанлыгын саклап калу һәм гаилә һәм гаилә-туганлык элемтәләрен ныгыту белән кызыксынулары өчен рәхмәт белдерде.
Аннары барлык катнашучылар драма театры сәхнәсендә иҗади номерлар белән чыгыш ясадылар. Конкурсантларның шәҗәрәләре төрлелеге белән шаккатырды. Вәлиәхмәтовлар-Җәләевлар династиясе, мәсәлән, 450 елдан артык педагогик стажга ия. Гаилә мәгариф өлкәсендә атказанган укытучылар һәм хөрмәтле хезмәткәрләр белән дан тота.
Ике тур нәтиҗәләре буенча муниципаль этапта Шәңгәрәевлар гаиләсе җиңү яулады. Алар безнең районны фестивальнең Мөслим шәһәрендә узачак зона этабында тәкъдим итәчәкләр.