Басудагысы түгел, амбардагысы икмәк

Басудагысы түгел, амбардагысы икмәк дип, юкка гына әйтмиләр шул халыкта. Район басуларында бүген кызу эш өсте. Урып-җыю эшләре торышы белән танышу һәм алдынгы комбайнчыларны билгеләп узу максатыннан чыгып, 23 июль көнне Әлмәт муниципаль районы башлыгы М.Х. Салихов Токарликов исемендәге ААҖ, "Союз-Агро", "Аппак" , "Кичүчат" һәм "Актау" хуҗалыкларында булды.

Беренче тукталыш Токарликов исемендәге ААҖ кырларында ясалды. Биредә уҗым бодаен 980 гектар мәйданда җыеп алганнар. Урып-җыю эшләренә 16 июльдән үк керешкәннәр. Борчак культурасын 350 гектар мәйданда урганнар, тагын 100 гектарда җыясы калган. Хуҗалык басуларында 17 комбайн эшли.

Токарликов исемендәге ААҖ районның иң эре хуҗалыкларының берсе санала. Быел да җәмгыять уңыш җыюга беренчеләрдән булып керешкән һәм тиз арада матур күрсәткечләргә ирешкән. Бу уңайдан хуҗалыкның 13 комбайнчысы район башлыгының Рәхмәтенә һәм акчалата премиягә ия булды. Мондый хезмәткәрләр белән, чыннан да, горурланырга була.

"Союз - Агро" хуҗалыгында да урып-җыю эшләре югары темплар белән бара. Монда, шулай ук, уҗым бодае культурасын җыю белән мәшгульләр. Уртача уңыш күрсәткече - гектарыннан 25,6 центнер.

- Эш темпын тизләтү өчен хәтта ике смена оештырдык, - ди Кузайкино бүлекчәсе начальнигы Александр Мазуркин. Баш агроном Илнар Харисов һәм аның бүлекчә агрономнары солар. Бу алым җир эшкәртү культурасы, чүп үлән, корткыч-бөҗәкләр белән көрәшү чарасы һәм эшләүче агрегатларның борылу полосасы да булып тора. Әлеге онытылып барган алымны районыбызның барлык хуҗалыкларында да кертү зарур, - ди авыл хуҗалыгы идарәсенең консультанты Хәким Нәкыев.

"Аппак"ның уҗым кырында хуҗалыкның үз комбайны һәм район отрядыннан тагын бер комбайн эшлиләр иде.

-Хуҗалыкта техника паркын яңарту таләп ителә. Уҗым культуралары быел 120 гектар мәйданда чәчелде, уңыш начар түгел, - ди хуҗалык җитәкчесе.

Мәҗит Хаҗипович район буенча булган уңыш күрсәткечләренә бәя биреп, быелгы уңышны түкми-чәчми һәм үз вакытында җыеп алуны күздә тотып эшләргә кирәклегенә басым ясады.

-25-28 процент дымлылык белән эшкә керешсәк, бүгенге көндә инде 14-15 процент белән дәвам итәбез. 18 июльдән башлап уңыш җыюга 24 хуҗалык та кереште, бүгенге көнгә мәйданның 12 проценты инде җыеп алынды. Шушы көннәрдә районга икмәк тапшыру күләме республика тарафыннан җиткереләчәк. Уңышны җыеп алу белән бергә көзге культуралар чәчүгә җир әзерләү һәм киләсе ел уңышы өчен туңга сөрүне параллель алып бару кирәк, - дип ассызыклады район башлыгы.

Район каршында оешкан мехотрядта 10 комбайнның барысы да хуҗалыкларда эшлиләр. Моннан тыш нефтьчеләрнең дә ярдәме зур. Муниципалитет тарафыннан алдынгы механизаторларны премияләү положениесе булдырылып, бүләкләүне эш урыннарында тапшыру оештырылган.

Район башлыгы "Кичүчат" һәм "Актау" хуҗалыкларындагы урып-җыю эшләре белән танышты. Әлеге ике хуҗалыкта да эшләр оешкан төстә бара. Басуларда техника туктаусыз эшли. Теләк бер генә - уңышны җил-яңгыр тидермичә вакытында җыеп өлгерергә. Җәйнең бер көне елны туйдыра, диләр бит.

Резеда ИСМӘГЫЙЛЕВА