Осталарны сынау куркытмый

Эшче һөнәренең абруен арттыруда төрле югарылыкта уздырылган ярышлар мөһим роль уйный. Әлмәт муниципаль районында һөнәри осталык бәйгеләре уздыру күп еллар дәвам итүче күркәм традиция.

Шәһәрнең төрле төзелеш объектларында ташчылар, эретеп ябыштыручылар, балта осталары, плитә ябыштыручылар һәм башка белгечләр үзара көч сынашып, осталыкларын чарлыйлар.

16 июль көнне Әлмәтнең инфекция хастаханәсендә малярлар ярышы булып узды. Бәйгене үткәрү өчен "АИСК" җәмгыяте җаваплы итеп билгеләнгән иде. "Арслан", "АРСУ", "СМП- Нефтегаз" һәм "АИСК"ның ике командасыннан 12 кеше ярыш алды мәшәкате белән мәшгуль. Кемдер үзләре белән алып килгән эш коралларын барлый, кемдер буяу алып килә, икенчеләре бәйге үтәчәк бүлмәне күздән кичерә.

Положение буенча бәйге теоретик өлештән башланды. 25 сорауга җавап бирү өчен 15 минут вакыт бирелде. Җирәбә уздырганнан соң, командалар эшләячәк бүлмәләр ачыкланды.

Башка еллардан аермалы буларак, быел малярлар обой ябыштыру буенча түгел, технологияне берникадәр үзгәртеп, стеналарны буяуда көч сынашты.

Икешәр кешедән торган командаларга буяулар, колер таратылды. Ханымнарга бирелгән үрнәк төсен чыгарып, палаталарның бер як стенасын буяу бурычы куелды. Тизлектән тыш башкарылган эшнең сыйфаты, чисталык, куркынычсызлык таләпләре, кулланылган буу күләме, төснең туры килүе дә комиссия әгъзалары тарафыннан игътибарга алынды.

Теоретик өлештә 25 мөмкинлектән 22 балл җыеп, "АИСК" командасы беренче булган иде

Бәйгенең практик өлешендә дә 13 минут эчендә үзләренә тапшырылган эшне башкарып Гөлназ Закирова, Наталья Нуретдиновадан торган "АИСК" командасы алдынгы булды.

"Нәтиҗәләре нинди генә булмасын, мондый чараларда катнашу үзеңне сынарга, өйрәнергә, башкалардан үрнәк алырга бер старт булып тора"- диләр алар. "АРСУ"дан Рәмзия Зиннәтова белән Рәсимә Сабирҗанова мәсәлән, ярышларда 6 ел катнашалар. Алар үз бригадаларында иң тәҗрибәлеләрдән санала. "Арслан" төзелеш компаниясеннән Валентина Герасимова белән Валентина Потемкина шактый стажлы малярлардан исәпләнсәләр дә, һөнәри осталык ярышында беренче тапкыр катнашалар.

Башкарылган эшне барлык критерийләр буенча бәяләгәннән соң, командаларга баллар куелды. Теоретик һәм практик өлешләрне кушып исәпләгәннән соң I урынны "СМП-Нефтегаз" командасы алды. II урынны "АРСУ" һәм "АИСК" командалары бүлеште. III урын "Арслан" лыларга бирелде.

Фәрдия ХӘСӘНОВА