Әлмәтнең авыл җирлекләре ветераннар советы игътибар үзәгендә

Районда һәм шәһәребездә эшләп килүче ветераннар советларының эшчәнлеге өлкән буын кешеләренә медицина һәм коммуналь хезмәт күрсәтүне, аларның тормыш шартларын яхшыртуга юнәлдерелгән.

Моннан тыш та хәл итәсе мәсьәләләрнең очы-кырые юк. Бу хакта 27 июньдә Түбән Мактама бистәсендә авыл җирлекләре башлыклары катнашында булып узган семинарда сүз барды.

Очрашу Түбән Мактама белән танышудан башланды. Киңәшмәдә катнашучылар төбәкне өйрәнү музеенда, 1 нче һәм 2 нче гомумбелем бирү мәктәпләрендә, 63 нче балалар бакчасында булды. Әйтергә кирәк, районыбызның бу торак пункты башкалар арасында аеруча чисталыгы, инфраструктура үсеше белән аерылып тора. Ел саен биредә халык саны да арта. Бистәдә бүген 10 меңгә якын кеше яши, ә аңа караган Тихоновка авылында яшәүчеләр саны – 1700.

– Түбән Мактама халкы һәрдаим район җитәкчелеге һәм нефтьчеләребезнең ярдәмен тоеп яши, “Татнефть” компаниясе тырышлыгы белән балалар бакчасы, мәктәпләр яңартыла, юллар төзелә, – дип башлады сүзен шәһәр тибындагы бистә башлыгы Әлфия Слесарева. – Бездә үсеп килүче буынга да, олыларга да тигез игътибар бирелә. Өлкәннәр көнендә, Җиңү бәйрәмендә төрледән-төрле чаралар оештырыла, беркемне дә читтә калдырмыйбыз.

Ветераннар советы рәисе Васыйл Хуҗахмәтов киңәшмәнең төп темасын билгеләгәннән соң, авыл җирлекләрендә эшләп килүче ветераннар советларының эшчәнлеге хакында чыгыш тыңланды. Җирле үзидарә советлары ярдәме белән ветераннар оешмаларының күпчелегенә уңайлы шартлар тудырылган булса да, барысы да актив эшчәнлек алып бармый булып чыкты, ягъни пенсионерлар, сугыш һәм хезмәт ветераннары ихтыяҗларын канәгатьләндерерлек дәрәҗәдә түгел икән.

- Ветераннар советлары рәисләренә авыл җирлекләре башлыклары белән кулга-кул тотынып эшләргә, авыл хуҗалыгы предприятиеләре, депутатлар, мәктәп коллективлары һәм башка социаль хезмәтләр белән дустанә мөнәсәбәтләр урнаштырырга кирәк, – диде ветераннар советы рәисенең беренче урынбасары Анатолий Никифоркин. – Бер яктан, бу өлкән һәм яшь буын арасында тәҗрибә уртаклашу күпере булса, икенче яктан, күп кенә хәл ителәсе сорауларны чишәргә ярдәм итә.

Ул шулай ук урыннарда музей эшчәнлеген җәелдерергә, үзешчәннәр смотр-бәйгеләрендә актив катнашырга һәм сәламәт яшәү рәвеше алып барырга киңәш итте.

Семинарда Түбән Мактама, Чуваш Сәрәне, Урсан Кәләе, Новотроицк авыллары ветераннар Советы рәисләре дә эш тәҗрибәсе белән уртаклашты.

Кинәшмәдә катнашкан район башкарма комитеты җитәкчесе урынбасары Алексей Грушин мондый очрашуның ике як өчен дә файдалы булуын, шәһәрдә эшләп килүче ветераннар оешмасы мисалында авылларда да төрледән-төрле түгәрәкләр булдырырга кирәклеген ассызыклады. Ул ветераннар оешмалары арасында уздырылган үзешчән сәнгать бәйгесе җиңүчеләренә лаеклы бүләкләрен тапшырды. Алар арасында Әлмәт, Түбән Мактама, Рус Акташы, Урман Кәләе җирлекләре коллективлары бар иде.

Рәдифә Ногманова