Әлмәттә иң яхшы чыгарылыш укучылары хөрмәтләнде

Мәктәпләрне алтын һәм көмеш медальгә тәмамлаучылар хөрмәтенә тантана уздыру калабызның күркәм традициясенә әйләнде. Менә быел да иң яхшы чыгарылыш укучылары драмтеатрга җыелды.

Чыгарылыш сыйныф укучылары өчен мәктәп белән хушлашу мизгелләре килеп җитте. Бу көннәрдә уку йортларында чыгарылыш кичәләре бара. Быел шәһәр һәм район буенча 1090 егет һәм кыз урта белем алу турында аттестат ала. Мәктәпләрне аларның 54 е алтын медаль, 69 ы көмеш медаль белән тәмамлый. Тырышып белем эстәүчеләр саны быел узган елга караганда күбрәк. 2011-2012 уку елында укучыларның 57 се алтын һәм 39 ы көмеш медальгә ия булган. Дөньяда иң зур байлык – белем. Моны балаларның яхшы аңлавы – сөенечле күренеш. Укучыларыбыз төрле дәрәҗәдәге олимпиадаларда да җиңүләр яулый. Быелгы уку елында республика, Бөтенроссия фән олимпиадаларында Әлмәт командасы 36 призлы урын яулаган.

Тырышып белем эстәүчеләрне район башлыгы да котлады.

– Һәр медаль артында укытучыларның да зур хезмәте ята. Киләчәктә тә Әлмәт районы сзнең белән горурланырлык булсын! – диде Мәҗит Салихов яшьләргә теләкләрен, педагогик коллективларга рәхмәтен җиткереп.

Фидакарь укытучыларга бай төбәгебез. 408 укытучы – төрле грант иясе. Балаларга ныклы белем биргән, укучылары төрле дәрәҗәдәге бәйгеләрдә, олимпиадаларда уңышлар яулаган укытучыларга ел саен район башлыгының гранты тапшырыла. Ике ел эчендә 300 педагог бу мәртәбәле премиягә лаек булды. Быел аларның сафы тагын 150 мөгаллимгә артты. Укучыларның медальләрендә остазларының зур хезмәте булган кебек, шәкертләр дә үз чиратында тырышып укып, апа-абыйларының уңышларына ярдәм итә.



– Юлыгызда очраган теләсә нинди авырлыкларны җиңәячәгезгә ышаныч зур, чөнки сез хезмәтсөючән. Мәктәбегезне онытмагыз, без сезне һәрчак көтәбез, ярдәм итәргә әзербез, – диде 7 нче мәктәпнең тарих һәм хокук белеме укытучысы Наталья Калугина.

Муниципалитет алтын һәм көмеш медаль ияләренә һәр елдагыча бүләк тә әзерләгән. Үткәргечсез клавиатурага һәркем шатланды. Иң яхшы чыгарылыш укучысы булып 16 нчы мәктәптән Әлфия Зәбирова танылды. Мәктәпне алтын медальгә тәмамлаган Әлфия бик күп тапкырлар олимпиадаларда җиңгән, призлы урыннар яулаган, биологиядән БДИда 100 балл җыйган. “Альком” фирмасы аңа компьютер бүләк итте.

Быелгы медальчеләр үзләренең алтын һәм көмеш исемнәрен уку йортлары тарихларына яздылар. Аларның киләчәктә шәһәр, республика, ил елъязмасына да күркәм шәхесләр булып керәчәгенә шик юк.