Сәхнә түрендә – ак халатлы шәфкать ияләре

Табиб - кешелекнең үзе белән бергә барлыкка килгән иң борынгы һөнәрләрнең берсе. Тормыш, яшәеш никадәрле генә алга китмәсен, ак халатлы шәфкать ияләренә булган ихтыяҗ кимеми, киресенчә, арта гына бара. Аларның хезмәте аша меңәрләгән тормышлар саклап калына, авырулар кисәтелә, сәламәт булып, сөенеп яшәү мөмкинлеге булдырыла. Һәр елны, июнь аеның өченче якшәмбесе Россия күләмендә медицина хезмәткәрләренең профессиональ бәйрәме буларак билгеләп үтелә.

Әлмәт муниципаль районы сәламәтлек саклау учреждениеләрендә хезмәт куючылар 11 июнь көнне Әлмәт драма театрына җыелды. Табибларны һәм шәфкать туташларын район башлыгы Мәҗит Салихов тәбрикләде.

Ул әлеге өлкәдә эшләүчеләрнең хезмәте никадәрле авыр, җаваплы һәм кирәкле булуын ассызыклап, әлеге минутларда да хезмәт постларында кешеләрнең сәламәтлеген яхшыртуга хезмәт итүчеләргә ихтирамын белдерде.

Әлмәттә 16 шәһәр һәм республика сәламәтлек саклау учреждениеләренең филиаллары исәпләнә, аларда 2983 кеше эшли, шуларның 508е табиблар. Федераль һәм республика җирлегендә эшләп килүче программалар, “Татнефть” җәмгыяте ярдәме белән күп кенә хастаханәләрне, авыллардагы фельдшер–акушерлык пунктлары, табиблык амбулаторияләрен бүгенге көн таләпләренә җавап бирерлек итеп төзекләндерергә һәм кирәкле җиһазлар белән тәэмин итәргә мөмкинлек тудырды. Бу бер яктан әлеге учреждениеләрдә хезмәт куючыларның эш шартларын яхшырту булса, икенче яктан килгән халыкка күбрәк уңайлыклар тудыру, хезмәт күрсәтүнең сыйфатын арттыруга этәргеч», - дип билгеләп узды Мәҗит Хаҗипович. Министрлык, “Татнефть” ААҖ һәм муниципалитет арасында төзелгән өч яклы килешү нигезендә, “Яшьлек” микрорайонында “Сезнең гаилә докторы” дип аталучы үзәк хастаханә филиалы ачылу турында без инде язган идек. Район башлыгы сүзләренә караганда, юбилейлар елында шушындый ук бүләк “Көнбатыш капка” микрорайонында яшәүчеләр өчен дә булдырылачак. Тантана башкарма комитет һәм Советның Мактау грамоталарын тапшыру белән дәвам итте.

Әлмәт - медицинадагы уникаль һәм катлаулы технологияләргә нигезләнеп, фән һәм техниканы кулланып бөтен Татарстан халкына югары сыйфатлы хезмәт күрсәтүче табиблар шәһәре дисәк тә ялгышмабыз. “Татнефть” ААҖ медицина частендә иң катлаулылардан саналган 1449 операция уздырылган, тарихта беренче тапкыр 2012 елда йөрәккә һәм аорталарга гибрид операция ясалган.

2012 елда Перинаталь үзәк урнашкан балалар шәһәр хастаханәсе “РФ иң яхшы бала тудыру йортлары -2012” Милли бәйгесендә лауреат дипломына лаек булды. Учреждениенең баш табибы Лидия Исмәгыйловага район башлыгы телевизор тапшырды. “Очрашу вакытында булачак әниләр шундый теләк белдергәннәр иде, без аны үтәдек. Телевизор соңгы һәм файдалы яңалыкларны гына җиткереп торсын,” - диде ул баш табибка бүләкне тапшырганда.

Район башкарма комитет җитәкчесенең Сәламәтлек саклау буенча урынбасары Равил Хәйруллин ял, бәйрәмнәрне белми, халык сәламәтлеге сагында торган хезмәттәшләренә кайнар тәбрикләү һәм рәхмәт сүзләрен җиткерде. Учреждениеләренең материаль-техник базасын ныгыту, югары квалификацияле белгечләр белән тәэмин итү кебек, башка регионнарда көнүзәк булып саналган мәсьәләләрнең һәрвакыт нефтьчеләр, район җитәкчелеге белән берлектә хәл ителүенә басым ясады. Бүләкләүләр вакытында сәхнәгә беренчеләрдән булып 3 нче поликлиника табибы, травматолог Альберт Нуришанов күтәрелде. Аның хезмәтләре Россия Федерациясе Сәламәтлек саклау министрлыгының Мактау грамотасы белән билгеләп үтелде.

ТР Дәүләт Советы депутаты, Әлмәт хатын –кызлар оешмасы рәисе Гүзәл Еремеева үзенең чыгышында: “Сез кешеләрнең сәламәтлеген кайгыртасыз, гомерләрен саклап каласыз. Депутат эшчәнлеге вакытында дәвалау учреждениеләре хезмәтеннән канәгатьсезлек белдергән бер генә гариза да кермәде, бары тик рәхмәт сүзләре генә әйтәләр,”- дип ассызыклап узды ул. Әниләргә, бәбиләргә тагы да уңайлырак булсын өчен шәһәр бала тудыру йортының акушерлык бүлегенә кондиционер бүләк итте.

Бәйрәмдә республикакүләм уздырыла торган “Ак чәчәкләр” бәйгесендә катнашучылар да сәхнәгә чакырылды. Аларга дипломнар һәм истәлекле бүләкләр тапшырылды.

Медицина хезмәткәрләре көненә багышланган бәйрәм коллективның үз артистлары, район һәм шәһәрнең сәнгать осталары чыгышлары белән үрелеп барды.

Фәрдия ХӘСӘНОВА