Мактамада гөрли Сабантуе

8 июнь көнне Әлмәт муниципаль районы башлыгы Мәҗит Салихов Түбән Мактама бистәсендә узган милли бәйрәмебез – Сабантуйда катнашты.

Мактама халык саны, социаль–икътисади үсеше һәм яшәеш дәрәҗәсе белән шәһәрдән берни белән дә калышмый. Биредәге халык эшли, яши һәм ял да итә белә. Сабантуйдагы халыкның күплеге, мәйданның төрле почмакларында оештырылган уеннар, бай концерт программасы бәйрәмнең күңелле узачагына ишарә ясый.

Бәйрәм театральләштерелгән тамаша һәм бистәнең хуҗабикәсе Әлфия Слесарева чыгышы белән башланып ките. Тәбрикләүләрне район башлыгы Мәҗит Салихов дәвам итте.

"Бүген районыбыз авылларында Сабантуйлар гөрләп уза. Авыл хезмәтчәннәре язгы кыр эшләрен кыска вакытларда тәмамлап, киләсе ел уңышына нигез салдылар. Мактама җирләрендә эшчәнлек алып баручы “Союз- Агро” хуҗалыгы республикадагы иң эре инвесторларның берсе, алар өр-яңа технологияләрне гамәлгә куялар, авыл хуҗалыгының тотрыклы үсешен тәэмин итәләр", – дип билгеләп узды ул үзенең чыгышында. Агымдагы елда шәһәргә 60, Татарстан нефте табылуга 70 ел тулуын ассызыклап, Мактама халкын һәм килгән кунакларны бәйрәм белән котлады, сәламәтлек, уңышлар теләде.

Бәйрәм флагын тантаналы төстә күтәрү хокукы каратэ һәм милли көрәш буенча ТР көмеш призеры Ленар Сөләймановка бирелде.

Әлмәтнең аэроклубына йөрүчеләр оештырган тамаша һәркем өчен дә кызыксыну уятты. Аэропланнар белән кызыксынучылар арасында бистәнең абруйлы кешесе Марс Залятовның булуы, аның авылдашларын сәламләп һавада мастер-класс күрсәтүе ,чын мәгънәсендә, Сабантуй бүләге булды. Милли бәйрәмнең тантаналы өлеше төрле юнәлешләр буенча Мактама бистәсен данлаучыларны бүләкләүгә багышланды. Авыл башкарма комитетының Рәхмәт хатлары, истәлекле бүләкләренә спортчылар, артистлар, күп катлы йортларның ишек алларында чәчәк үстерүчеләр лаек булды. 60 ел бергә матур гомер кичерүче Хәмзә һәм Саҗидә Мөхәммәдиева, Мизхәт һәм Суфия Галиуллиналар да бар иде. Сабантуй мәйданында барган көрәш, спорт уеннары белән бергә мактамалылар хозурына республикабызның танылган артистлары Салават Фәтхетдинов, Бәширә Насыйрова чыгышлары тәкъдим ителде. Елдагыча, Мактама Сабантуе бик югары дәрәҗәдә узды.

Фәрдия ХӘСӘНОВА, “Альметьевский вестник” газетасы.