Шәһәр төзекләнүен дәвам итә

5 июнь көнне шәһәр төзелеше советының чираттагы утырышы булып узды. Аның эшендә район башлыгы Мәҗит Салихов, башкарма комитет җитәкчесе Марат Гирфанов һәм башка җитәкчеләр катнашты. Көн тәртибенә 11 мәсьәлә куелган иде.

Традиция буенча иң элек алдагы шәһәр төзелеше утырышында кабул ителгән карарлар үтәлеше турындагы отчет тыңланды, бәя бирелде.

Федераль программалар буенча салынучы торак йортларның фасады көн тәртибенә куелган беренче мәсьәлә иде. Ленин урамы 2 А, Тукай урамы 27 нче йорт стеналарына юбилей даталарын язуны комиссия әгъзалары кирәк түгел дип тапты. Радищев урамы 3 нче, Чернышевский урамы 46 нчы йортларның бизәлеш проектын берникадәр күңеллерәк итәргә дигән тәкъдимне хуплап каршы алдылар. Алар шәһәр фоныннан аерылмаска, шул ук вакытта, төсләргә баерак булырга тиеш.

Шәһәрнең 60 еллыгы, Татарстан нефте табылуга 70 ел тулу хөрмәтенә төзелүче паркка табигый ташлардан – грот формасында фонтан кую мөмкинлеге каралды, реконструкция эшләрен тизләтергә кирәклегенә басым ясалды. “Шәһәр мохите” бәйгесендә тәкъдим ителгән вариантлар буларак, урамнарны пыяла пластик һәм төрле кушылмалардан ясалган мультфильм геройлары белән бизәүне татар әкиятендәге персонажларга алыштырылган очракта кулланырга мөмкин дип тапты шәһәр төзелеш советында катнашучылар. Түбән Мактамада элеккеге кирпеч заводы территориясендә машиналар юу урыны һәм сервис төзү турындагы тәкъдим һәркемнең күңеленә хуш килде.

“Татарстан” кинотеатры администрациясенең үз территорияләрен киңәй-тү, сәүдә үзәге ачу, “Радиоприбор” заводы янәшәсендә машиналар сату үзәге төзүгә юнәлтелгән проектлар кире кагылды.

Фәрдия Хәсәнова, “Альметьевский вестник” газетасы