“Корыч ат” иярләүчеләр бәйгесе

Һөнәри осталык бәйгеләре арасында сабанчылар ярышы аерым урын алып тора. Авыл хуҗалыгы хезмәтчәннәре өчен матур бер бәйрәмгә әверелгән ярышлар быел Әлмәттә 48 нче тапкыр уздырылды. 3 июнь көнне “Яңа Суркино” җәмгыяте басуларында узган һөнәри осталык бәйгесендә район хуҗалыкларында хезмәт куючы 18 механизатор үзара көч сынашты, шуларның 6 сы яшьләр иде.

Ярышлар Әлмәт муниципаль районы башлыгы Мәҗит Салихов тәбрикләве белән башланып китте.

Районда 90 мең гектардан артык сөрү җирләре исәпләнә. Сезнең тырышлык белән язгы кыр эшләрен үз вакытында уңышлы тәмамладык, 50 мең гектардан артык бөртекле, 20 мең гектар азык культуралары чәчтек. Тырыш хезмәтегез, җиргә тугры калганыгыз өчен рәхмәт сезгә,– диде ул. Корыч ат иярләүчеләр бәйгесенең эшче һөнәренең абруен арттыруга хезмәт итүен, ел саен яңадан – яңа элементлар кертелүен билгеләп, авыл хуҗалыгында эшләүчеләргә мөмкин кадәр күбрәк булышлык күрсәтергә кирәклеген ассызыклады. Механизаторларга уңышлар, яңгырлар булуын теләп, барлык авыл хуҗалыгы хезмәтчәннәрен дә Сабантуй бәйрәменә чакырды. Ярышларның флагын тантаналы төстә узган елгы һөнәри осталык бәйгесе җиңүчесе “Ярыш” хуҗалыгыннан Андрей Барсуков күтәрде. Аннары бәйгеләрнең баш судьясы Хәким Нәкыев ярышларның тәртибе, сөргәндә беренче чиратта нәрсәләргә игътибар бирергә кирәклеген аңлатты. Әзерлек эшләренә 20–30 минут вакыт бирелгәнлектән, механизаторларның һәрберсе“ корыч атлары” янына юнәлде. Бәйгедә катнашучы техникаларның модельләре елдан-ел алмашынып тора. 30-40 еллык ДТлар, иске типтагы ”Беларусь”МТЗлардан башлап тулысынча компьютерлаштырылган, заманча техникалар да катнашты сабанчылар ярышында. Шартлар төрле булса да, механизаторлар алдына куелган таләпләр бер үк: җирне каплатып сөрү һәм туфракның өстен сыйфатлы итеп эшкәртү. Механизаторларның эшләре 10 төрле юнәлеш буенча бәяләнде.

“Корыч ат”ларын иярләгән механизаторлар осталыкта сынашу өчен Яңа Суркин басуы буйлап таралды. Кемнең ничек эшләгәнлеге кырларыннан күренә шул. Бирелгән участокны уртадагы таяктан үлчәп сөрә башлау, дөрес итеп каплату, чүп үләннәрен юк итү – бөтенесе исәпкә алына бу очракта. Ярышлар тәмамлангач халык район мәдәният йорты артистларының көче белән әзерләнгән концерт программасын карарга мәйданга тартылды, җырлар спорт уеннары белән алышынды. Катнашучылар, хуҗалык җитәкчеләре аркан тарту, гер күтәрү, капчык киеп йөгерү кебек бәйгеләрдә дә сынатмадылар. Җиңүчеләрне район башлыгы М.Х.Салихов тәбрикләде. Ул башка районнарда инде онытылып бара торган бу чараны алга таба да дәвам итәчәкбез дип белдерде.

Тәбрикләүләр тантанасы 2012 елдагы хезмәт күрсәткечләре буенча югары нәтиҗәләргә ирешкән механизаторларга район Советы һәм башкарма комитетның Рәхмәт хатларын тапшыру белән дәвам итте. Һөнәри осталык бәйгесендә беренчелекне “Чулпан”нан Марат Мостафин һәм Токарликов исемендәге җәмгыятьтән Иван Трофимов яулады. Икенче урынга “Зәй” дән Рафанад Агапов, өченче урынга “Яңа Суркино” ЯАҖ ннән Сергей Сальдиванов, “Васильевское” ЯАҖ ннән Марс Биктимеров, Хурамшин фермерлык җәмгыятеннән Фәрит Хәйруллин чыкты. “Яңа Суркино” ЯАҖндә озак еллар эшләгән Георгий Петров һәм “Первомайский” җәмгыятенең иң өлкән механизаторы Владимир Маврин күпьеллык тырыш хезмәте өчен махсус приз белән билгеләп үтелде.

Фәрдия Хәсәнова