Яшәсен «Алтын каләм»!

14 май безнең хәтердә олы бер вакыйга булып калачак. Чөнки без, Әлмәтнең 3 яшь журналисты, “Алтын каләм”– “Золотое перо” балалар һәм яшьләр республика фестивале региональ турының җиңүчеләре буларак, Казанга юл алдык. XVIII фестивальнең ачылу тантанасы Казан шәһәреннән берничә чакрым ераклыкта, табигать кочагында урнашкан “Волга” яшьләр үзәгендә булды. Тулы иҗат ялкынында узган 4 көн онытылмас һәм нәтиҗәле бер мизгел булып истә калды.

Безне яңа танышулар, дуслар табу, берләшмәләрдә эш алып бару, газетага исем уйлау кебек мавыктыргыч эшләр көтте. Талантлы, күренекле кешеләр белән очрашулар да бик кызыклы булды. FISU Мәгариф үзәге директоры Лилия Бариева, “Синтез” ватерпол командасы тренеры Ирек Зиннуров, КФУ фәннәр институтының татар журналистикасы кафедрасы мөдире Васил Гарифуллин, “Татарстан – Яңа гасыр” телерадиокомпаниясе генераль директоры урынбасары Миләүшә Айтуганова , Дәүләт советы депутатлары белән очрашулар – шуларның кайберләре. Казан шәһәренең күп тиражлы газета мөхәррирләре дә безнең белән бик теләп тәҗрибә уртаклаштылар. “Татмедиа” акционерлык җәмгыяте хезмәткәрләре төрле темаларга чыгыш ясап, журналистика серләренә төшенергә ярдәм иттеләр.

4 көн эчендә кайда гына булмадык та, кем белән генә аралашмадык. Зөягә иҗади командировкага бардык, Универсиада объектлары белән таныштык. Ә иң истә калганы Дәүләт Советына бару. 16 май көнне ТР Дәүләт Советы рәисе Фәрит Мөхәммәтшин журналистлар белән очрашу уздырды. Татарстанның алдынгы каләм ияләре белән беррәттән без дә чарада катнаштык. Без “Алтын каләм”дә катнашучылар исеменнән чыгыш ясап, фестиваль турында сөйләдек, махсус язылган бер куплет җыр җырладык. Соңыннан без Фәрит Мөхәммәтшин, Римма Ратниковадан интервью алдык һәм үзебезнең газета битләрендә язып чыктык.

Фестивальнең дүртенче көне шатлыклы да, моңсу да иде. Ябылу тантанасында катнашкан Римма Ратникова чараның бик нәтиҗәле узуын, яшь журналистлар арасында талантлы, өметле яшьләрнең күп булуын ассызыклап узды.

Әлеге фестивальдә минем беренче катнашуым, 4 көн дәвамында күп нәрсәгә өйрәндем, дөнья күрдем. “Яшь профессионал” номинациясендә дипломга лаек булдым, “Алтын каләм “статуэткасы белән бүләкләндем. Миңа ышанып, фестивальдә катнашу мөмкинлеге тудырган, гомумән, журналистика өлкәсендә күп нәрсәләргә өйрәткәннәре өчен “Альметьевский вестник” газетасы баш мөхәррире Ландыш Зариповага олы рәхмәтемне белдерәм. Мондый чараларда катнашу, алынган бүләкләр киләчәктә тырышыбрак эшләргә көч бирә, күп нәрсәгә өйрәтә. Яшәсен “Алтын каләм”!

Айдар ГАЗИЗУЛЛИН
“Альметьевский вестник” газетасы