Тырыш хезмәткә лаеклы хөрмәт

60 еллык тарихы булган Әлмәт шәһәренең үсешендә өлкән буын ветераннарыбызның хезмәте аеруча зур. Кайсы гына тармакта булмасын, аларның күпьеллык фидакарь хезмәте калаларны төзергә ярдәм иткән, нефть промышленностен күтәргән, авыл хуҗалыгының киң юнәлештә үсеш алуын тәэмин иткән. 25 май көнне үзенең 80 яшьлек олы юбилеен билгеләп узган Самат Сираҗетдин улы Әхтәмов шундый легендар шәхесләрнең берсе. Исеме Әлмәт районында гына түгел, бөтен республикага билгеле колхоз рәисенең олуг юбилее уңаеннан, ул 33 елдан артык җитәкчелек иткән “Ярыш” хуҗалыгы предприятиесе урнашкан Габдрахман авылында аның хөрмәтенә мемориаль такта ачылды. Быел оешуына 285 ел тулуны билгеләп узачак авыл тарихында бу тагы бер матур сәхифә.

Самат Сираҗетдин улы Әхтәмов 1933 елда Нәдер авылында туып үскән. Шунда белем алган, колхозның төрле тармакларында эшләгән. Миллионер “Зәй” хуҗалыгы рәисе Һади Рахманов аның беренче остазы һәм юл күрсәтүчесе була. Алга таба ул аның эш тәҗрибәсенә еш мөрәҗәгать итә, яңа урында мөмкин кадәр күбрәк кулланырга тырыша. 33 ел вакыт эчендә “Ярыш” колхозы районда иң ныклы хуҗалык булып җитешә, Габдрахманның алдынгы торак пункт буларак социаль һәм икътисадыи яктан үсеш алуында да колхозның , анда эшләгән тырыш хезмәтчәннәрнең өлеше зур.

Хезмәтләре өчен Самат Әхтәмов Ленин, ике Кызыл Байрак, ике “Почет билгесе” орденнары белән бүләкләнгән, “Россия Федерациясенең атказанган авыл хуҗалыгы хезмәткәре” дигән мактаулы исемгә ия.

Юбилярны тәбрикләргә бик күп кунаклар килгән иде. Чарада ТР Авыл хуҗалыгы һәм азык-төлек министрының беренче урынбасары Минсагир Нуретдинов, Азнакай районы авыл хуҗалыгы идарәсе җитәкчесе Миргасим Усманов, Әлмәт муниципаль районы авыл хуҗалыгы идарәсе җитәкчесе Извил Габдрәкыйпов, хуҗалык рәисләре , ветераннар Советы вәкилләре, авыл кешеләре катнашты.

Тантананы ачып Извил Әнәсович район башлыгы Мәҗит Салиховның котлауларын җиткерде. Районның авыл хуҗалыгын күтәрүгә үзеннән лаеклы өлеш керткән, берничә буын яшьләр өчен остаз да, киңәшче дә була белгән Самат Сираҗетдин улы Әхтәмовка олы рәхмәт сүзләрен әйтеп, изге теләкләрен юллады.

-Самат Әхтәмов бигрәк тә өлкән буын кешеләренә яхшы таныш, 3 дистә елдан артык вакыт эчендә хуҗалыктагы эшне үз йорты, үз гаиләсендәге кебек, чын күңел биреп оештырган, югары биеклекләргә алып чыккан кеше. Шәһәр кочагында, промышленность үзәгендә урнашкан авыл хуҗалыгы предприятиесен җитәкләү җиңелләрдән булмаса да , исемнәре Мактау тактасыннан төшмәде, - диде Минсагир Гайсович үзенең тәбрикләү сүзендә. Аннары ул юбилярга ТР Президенты Рөстәм Миннеханов Указы белән бирелгән “Фидакарь хезмәте өчен” медален, Дәүләт Советы рәисе Фәрит Хәйруловичның адреслы папкасын, Авыл хуҗалыгы һәм азык-төлек министры Марат Әхмәтовның Рәхмәт хатын тапшырды .

Тәбрикләүләр тәмамлангач, тантаналы рәвештә “Ярыш” хуҗалыгы идарәсе урнашкан бинага беркетелгән мемориаль такта ачылды. Бәйрәм авыл үзешчәннәре чыгышлары белән үрелеп барды. Ахырдан җавап сүзе белән Самат Әхтәмовның улы, “Татнефть” ААҖнең ирекле медицина имминияте һәм ипотека күзәтчелеге буенча баш белгече Илдар Әхтәмов чыгыш ясады. Ул барлык туганнары, балалары исеменнән әтиләрен зурлаганнары, аның хезмәтенә олы бәя биргәннәре өчен рәхмәт сүзләрен җиткерде.

Фәрдия Хәсәнова, “Альметьевский вестник” газетасы