Халык мәнфәгатен кайгыртып

Вәлиев Илшат Тансык улы 2010 елда Кама- Исмәгыйль авылы җирлеге депутаты итеп сайлана. Эш урыны - «АУМиН» ЯАҖ директорлар Советы рәисе. Россия Федерациясе һәм Татарстан Республикасының атказанган төзүчесе. ТР Төзелеш, архитектура һәм торак-коммуналь хуҗалык министрлыгының Мактау грамотасына, Дәүләт Советы рәисенең Рәхмәт хаты һәм башка күп кенә дәүләт бүләкләренә ия.

2012 елда аның игелекле эшләре «Ел хәйриячесе» дипломы белән билгеләп үтелә.

2001 елдан башлап Илшат Вәлиев рәислегендә эш итүче “АУМиН” ябык акционерлык җәмгыяте төзелеш, капиталь ремонт, производство һәм социаль объектларны реконструкцияләү буенча уңышлы эшчәнлек алып бара. Төп заказчылары - нефть һәм газ чыгару идарәләре, предприятиеләр. Коллективтагы тотрыклылык җитәкченең депутатлык эшендә дә уңай чагылыш таба. Кама-Исмәгыйль авылы җирлеге башлыгы Рауль Дәүләтов ассызыклап узганча, Илшат Тансык улын авыл кешеләре һәм сайлаучылар әйткән сүзен үти торган эш кешесе буларак беләләр һәм хөрмәт итәләр. 2010 елдан башлап Кама–Исмәгыйль тормышында икенче этап башланды дисәк тә, ялгыш булмас. Узган ике ел эчендә авыл күләмендә башкарылган эшләрнең һәрберсендә Илшат Вәлиевнең хезмәте зур.

Башкарылган эшләр:

мәчеткә капиталь ремонт ясалган;
ташландык кибет административ бина итеп үзгәртелгән;
ипи пешерү пекарнясы төзелгән;
Кама – Исмәгыйль авылы мәктәбе койма белән әйләндереп алынган;
авыл Советы өчен җиһазлар кайтарылган;
су линияләре яңартыла һәм даими рәвештә ремонт эшләре алып барыла;
янгын куркынычсызлыгын исәпкә алып, авылда 5 буа төзелә;
узган ел 2 күпер салына башлап, быел әлеге эш ахырына җиткерелгән;
Сабантуй өчен яңа мәйдан булдырылган;
зиратның коймалары ремонтланган;
авыл медпунктында теш дәвалау кабинеты ачылган;
стоматология өчен кирәкле җиһазлар һәм препаратлар кайтарылган;
авыл Советы бинасында полиция хезмәткәре өчен аерым бүлмә җиһазландырылган.

Болардан тыш, авылдагы дини бәйрәмнәр, 8 март, 23 февраль, Яңа ел кебек гомумхалык бәйрәмнәрен уздыруда матди ярдәм күрсәтелә. Мәдәният йортына аппаратура һәм сәхнә костюмнары алына, төрле чараларда катнашу өчен үзешчәннәр һәрвакыт машина белән тәэмин ителә. Кыш көне юлларны кардан чистарту, ә җәй көне чүп түгү өчен махсус транспорт бирелә.

“АУМиН” хезмәткәрләре көче белән авыл территориясендә экологик шимбә-ләр үткәрелә. Күптән түгел генә Бөек Ватан сугышында һәлак булучылар өчен куелган мемориаль комплекс территориясен төзекләндерүгә дә Илшат Вәлиев үз өлешен кертте.

Депутатның эшчәнлеге авыл белән генә чикләнми. Аның тарафыннан даими рәвештә чиркәүгә, мәчеткә, Т. Шәйхуллин исемендәге фондка ярдәм күрсәтелә. Авыру баланы дәвалауга булышлык күрсәтү, шәһәр-нең 8 нче төзәтү колониясенә видеокүзәтү аппаратуралары урнаштыру, “Экосервис”ка чүп җыю баклары тапшыру, шәһәрне тө-зекләндерү һәм яшелләндерү эшләрендә катнашу, Габдулла Тукай һәйкәлен капиталь ремонтлауга матди ярдәм күрсәтү - шәһәр күләмендә башкарылган эшләрнең кайберләре.

Агымдагы елда да депутат актив позициясен дәвам итә. Ялгыз, караучысыз калганнарның йорт тирәсен, коймаларын яңарту өйлә-ренә су кертү кебек изге гамәлләрне дистәләп санарга мөмкин булыр иде. Быел Кама – Исмәгыйльдә салынган яңа күпер белән урам юлын тоташтырып 2 километрдан артык юл салу, ремонт үткәрү планлаштырыла. Әлеге эшләрдә дә Кама–Исмәгыйль авылы җирлеге депутат ярдәменә таяна.

Район кешеләре һәм сайлаучылар Илшат Вәлиевнең игелекле эшләренә бик рәхмәтле.

Фәрдия ХӘСӘНОВА