“Йолдызчыклар – 2013” бәйгесе тәмамланды

Әлмәт шәһәренә – 60, Татарстан нефте табылуга –70 ел тулуга багышланган чаралар көннән-көн киңрәк масштабларда уздырыла. Калабызның иң нәни гражданнары да бәйрәмне лаеклы уздыруга үзләреннән өлеш кертә. Әлмәт муниципаль районының мәктәпкәчә учреждениеләре арасында “Йолдызчыклар – 2013” бәйгесе оештырылган иде. Беренче чиратта, балаларны туган шәһәренең тарихы белән таныштыру, аларда горурлык хисләре тәрбияләү максаты белән оештырылган фестивальнең сайлап алу турында 47 мәктәпкәчә учреждениенең иҗат коллективлары һәм аерым балалар катнашты. 22 апрель көнне 36 нчы балалар бакчасында “Йолдызчыклар– 2013” шәһәр бәйгесенең бәйрәм һәм йомгаклау концерты булып узды. Чарада Әлмәт муниципаль районы башкарма комитеты җитәкчесе урынбасары Василий Самойлов, Мәгариф идарәсе җитәкчесе урынбасары Инна Гайфуллина, берләштерелгән профсоюз комитеты рәисе Татьяна Каяшева, “Одаренные дети” фонды башкарма директоры Леокадия Садчикова, бакча мөдирләре катнашты.

– Район һәм шәһәребезнең балалар бакчаларында яшь буынны тәрбияләү, аларның талантларын үстерү юнәлешендә искиткеч зур эшләр башкарыла. Кайсы гына эш юнәлешен алсаң да, мәктәпкәчә мәгариф өлкәсендә эшләүчеләрнең эш нәтиҗәләре Татарстан, Россия күләмендә югары бәяләнә. Без үзебезне күрсәтә алдык, хезмәтегез өчен рәхмәт сезгә, – диде башкарма комитет җитәкчесе урынбасары бәйрәм тантанасын ачып.
Чарада бәйгенең “Бию талантлары”, “Әдәби сүз”, “Җыр сәнгате” номинацияләрендә җиңүчеләр чыгыш ясады. 1 нче, 41 нче, нче, 57 нче, 58 нче, 27 нче балалар бакчаларында тәрбияләнүчеләр югарыда әйтеп үтелгән жанрларда чыгыш ясап, чараны чын, матур бәйрәмгә әверелдерелде.

Юбилей чараларына багышланган концерт бәйге җиңүчеләрен бүләкләү белән тәмамланды. Мактау грамоталарын Инна Гайфуллина тапшырды. “Әдәби сүз” номинациясендә I урынны 1 нче, 32 нче, 27 нче, 58 нче балалар бакчалары яулады. “Җыр сәнгате” номинациясендә алдынгылыкны 58 нче, 27 нче, 35 нче балалар бакчалары алды.

“Бию талантлары” номинациясендә 58 нче, 1 нче, 36 нчы, 20 нче, 41 нче балалар бакчалары җиңүче дип табылды. Якын араларда нәни йолдызчыкларның чыгышларыннан төзелгән концерт программасын шәһәр күләмендә күрсәтү күздә тотыла.

Фәрдия Хәсәнова,
“Әлмәт хәбәрләре” газетасы