15 апрельдән 14 майга кадәр юлларда транспорт хәрәкәтенә чикләүләр кертелә

ТР Министрлар Кабинетының 14 мартта кабул ителгән 164 нче санлы карары нигезендә, гомуми файдаланылыштагы региональ юлларда транспорт хәрәкәтенә 15 апрельдән 14 майга кадәр чикләүләр кертелә. Бу хакта 9 апрель көнне ТР Хөкүмәте йортында булып узган брифингта әйтелде. Чарада ТР транспорт һәм юл хуҗалыгы министры урынбасары Юрий Кузьмин, Казан шәһәре башкарма комитетының тышкы уңайлыклар булдыру комитеты рәисе Игорь Куляжев катнашты.

Россия Федерациясе территориясендә федераль, региональ, муниципаль әһәмияттәге юлларда транспорт хәрәкәте өчен вакытлыча чикләүләр кертү мәсьәләсен “Росавтодор” федераль юл агентлыгы, ТР Министрлар Кабинеты, муниципалитет карамагындагыларын район башкарма комитетлары хәл итә. Вакытлыча чикләүләр, 2007 елның 8 ноябрендә кабул ителгән 257 нче федераль законда һәм 2009 елның 3 августында кабул ителгән 43 нче ТР законында каралганча, 3 очракта кертелә ала: автомобиль юлларын реконструкцияләү, капиталь төзекләндерү вакытында; табигый-климатик шартлар уңайсыз булган чорда, транспорт чаралары гаять күп йөргән, бәйрәм һәм ял көннәре, юлларда хәрәкәт максималь тыгыз булган сәгатьләрдә.

Яз айларында кертелгән чикләүләр юл өслегенә басым көчен киметү, юлларны саклау максатыннан кертелә.

Белгечләр ассызыклап узганча, бу язда хәрәкәтне вакытлыча чикләү буенча “Росавтодор” агентлыгы тәкъдимен РФ Юстиция министрлыгы бүгенгә кадәр расламаган, шуңа күрә, федераль юлларда транспорт хәрәкәте өчен чикләүләр кертелмәячәк. Ә Татарстан буенча, Ю.Кузьмин искәрткәнчә, региональ әһәмияттәге юлларның 80 проценты узган гасырның 60-70-80 нче елларында 6 тонна басымга исәпләп салынган, шуның өчен дә, республиканың юл челтәрен саклап калу йөзеннән, вакытында чаралар күрү аеруча әһәмиятле. Аерым алганда, СНиП нормалары һәм кагыйдәләре буенча авырлык басымы 5 категориядә карала: I-II категория – 11,5 тонна, III-IV категория – 10 тонна, V категория – 6 тонна.

Шул рәвешле, региональ юлларга максималь басым түбәндәгечә билгеләнә: йөк төягән автомобильнең 1 күчәреннән – 6 тонна, 2 күчәрле арбадан – 5 тонна, 3 күчәрле арбадан – 4 тонна. Юлларга исә, вакытлыча шул хакта кисәткән юл билгеләре урнаштырылачак.

Әлеге чикләүләр халыкара йөк ташучыларга, автобуста пассажир ташучыларга, азык-төлек, балалар ризыгы, хайваннар, дарулар, чәчүлек орлыклары, ашлама, почта ташучыларга, 16 тоннага кадәр авырлыкта йөк ташырга сәләтле транспортта ягулык йөртүчеләргә кагылмый.

Авырлыклары тиешле нормадан арткан очракта, транспорт чараларына махсус рөхсәт алына. Кирәкле документларны Казан, Нурлат, Яр Чаллы һәм Әлмәт шәһәрләрендә, шулай ук, республика юлларында ай дәвамында эшләячәк 35 постта алырга мөмкин булачак.

Муниципалитет карамагындагы юлларга чикләүләр башкарма комитетның 21 мартта кабул ителгән 1223 санлы карары нигезендә кертелә.

Фәрдия Хәсәнова, “Әлмәт хәбәрләре” газетасы