“Альметьевский вестник” лицейда очрашуда

Узган атна “Альметьевский вестник” газетасы редакциясе өчен яңа очрашулар, кызыклы вакыйгалар белән үзенчәлекле булды. Моңа кадәр нәшер ителгән “Яшьләр заманы” газетасы базасында 15 елдан артык “Яшь хәбәрче мәктәбе“ эшләп килүе турында күпләрегез белгәндер. Исемебез үзгәрсә дә, җисемебез, тоткан кыйблабыз тагы да киңәйде, баеды дип әйтергә мөмкин. Әлмәт муниципаль районы, башкарма комитетның рәсми газетасы булсак та яшьләр, аларны борчыган проблемалар, талантлы һәм перспективалы яшьләрне эзләп табу, иҗади үсәргә ярдәм итү кебек мәсьәләләр безнең игътибардан читтә калмый. “Алтын каләм”-“ Золотое перо” республика фестивале башлану, Әлмәт шәһәренә - 60, Татарстан нефте табылуга - 70 ел тулу белән бәйле юбилей елы кысаларында без 1 апрель көнне Әлмәт дәүләт муниципаль хезмәт институтының матбугат үзәге студентларын редакциябездә кабул иттек. Аларга шәһәрнең журналистика белән бәйле тарихы, мәкалә язу үзенчәлекләре, муниципаль газетада темалар күтәрү һәм аларны яктырту мөһимлеге турында сөйләдек, яшь каләм ияләренең сорауларына җавап бирдек.

Шул ук көнне көндезге 12дә безне калабызның 2 нче лицеенда(элеккеге татар-төрек лицее) каршы алдылар. Тирә-як районнарда тупланган иң акыллы, иң талантлы укучыларны берләштергән мәгариф учреждениесендә без үзебезгә бик күп фикердәшләр таптык. Аларның үз газеталары да нәшер ителә. Күп еллардан бирле дәвам иткән хезмәттәшлегебезнең ачык чагылышы булып лицей укучыларының язмалары газетабыз битләрендә һәрвакыт урын алып килде. Газетаның баш мөхәррире Ландыш Зарипова укучыларга иҗат итү, яза белү осталыгының кайда гына булсалар да кирәк булуын, заман яшьләренең бүгенге чор таләпләренә яраклы булып тәрбияләнүендә әлеге процессның мөһим роль уйнавын ассызыклады. Без укучыларга Әлмәттә яшәгән, иҗат иткән күренекле журналистлар турында сөйләдек. “Альметьевский вестник” редакциясе, КФУның журналистика һәм социология факультеты белән берлектә гамәлгә куелган проектлар белән таныштырдык.

Сорау-җавап формасында барган очрашу ике як өчен дә кызыклы, файдалы булды. Әлеге чараны оештырганнары өчен без лицейның татар теле һәм әдәбияты укытучысы Зөлфия Исмәгыйлева һәм «Источник» газетасы мөхәррире Роза Баһаветдиновага олы рәхмәтебезне белдерәбез. Язу осталыгы булган, сәләтле яшьләребезне редакциябездә көтеп калабыз.

Ф.САБАЛЫ