Хөрмәттә узган гомер

Кешенең гомере еллар белән генә түгел, ул башкарган эшләр, тәрбияләгән балалар, тормышка булган мөнәсәбәте аша да бәяләнә. Бүген үзенең 80 яшен тутырган Шәйдуллина Сәвия Габдрахмановна 30 елга якын мәгариф системасында хезмәт куйган укытучы, иренә ышанычлы тормыш юлдашы, 5 үрнәк бала тәрбияләп үстергән әни буларак, асыл татар хатын– кызларына гына хас гомер кичергән чиксез хөрмәткә ия зат. Ул якыннары, туганнары, балаларының тормышын ямьләп, яшәүләренең мәгънәсен арттырып гомер кичерә.

Юбилярны Әлмәт муниципаль районы башлыгы Мәҗит Салихов, аның урынбасары Наҗия Хәйдәрова котлады. Мәҗит Хәҗипович Сәвия Габдрахмановнага Россия Президентының котлауларын җиткереп, юбилярга исәнлек–саулык, тыныч тормыш теләде.

Тәбрикләүләрне ветераннар Советы исеменнән Васил Хуҗиәхмәтов, кода– кодагыйлары, туганнары, балалары, оныклары дәвам итте.

Сәвия апа Шәйдуллина Башкортстан республикасы, Дәүләкән районы, Бердәм авылында ишле гаиләдә туып үскән.

–Мин гаиләдә уртанчы бала булганлыктан, бөтен эштә дә әниемә ярдәмче булырга омтылдым. Ул авылда иң булган, иң уңган хатын иде, зур тырышлык белән гомер кичерде. Без кече яшьтән кул арбасы тартып, печән, утын әзерләдек, мал асрап яшәдек. Бал ашап, кәҗә сөте эчеп үстек, – дип искә ала ул чакларны Сәвия апа.

1964 елда Уфа педагогия институтын тәмамлап, химия һәм биология укытучысы белгечлеге ала. 1960 елдан башлап хезмәт эшчәнлеге Әлмәт районы белән бәйле. Кәләй урта мәктәбендә уку бүлеге мөдире булып эшли, 1982 елдан балалар бакчасын җитәкли. Ике елдан соң яңадан мәктәпкә кайтып, балаларны химия һәм биология серләренә төшендерүен дәвам итә, лаеклы ялга чыкканчы мөгаллимәлектән аерылмый.

Яхшы хезмәткәр булудан тыш, тормыш иптәше, район һәм шәһәребезнең абруйлы кешесе Зөфәр Шәйдуллин белән бергә 5 бала үстерәләр, аларның һәрберсенә яхшы тәрбия, югары белем биреп лаеклы шәхесләр тәрбиялиләр. Кызлары Лилия Закирҗанова “Мәрхәмәтлелек” хәйрия фондының баш хисапчысы, Ландыш Гарифуллина “Әлмәтнефть” аппарат идарәсенең финанс бүлеге экономисты, уллары Марсель Шәйдуллин – Азнакай муниципаль районы башлыгы.

Бүген 80 яшен тутырган Сәвия Габдрахмановна чын мәгънәсендә соклану һәм ихтирамга лаек. Аның һаман да яшь булып калуының сере – тормышны, кешеләрне, хезмәтне яратуында. Ул бүген дә актив тормыш белән яши, өй түрендәге бакчада чәчәкләрнең аллысын да, гөллесен дә очратасың, яшелчәләрне дә үзе үстерә. Тәрәзә төбендәге гөлләрнең матурлыгына хәйран калырлык.

Фәрдия ХӘСӘНОВА
“Әлмәт хәбәрләре” газетасы