Идел буе яшьләре проблемалар һәм перспективалар фәнни-гамәли конференция югарылыгында

Бүген, 29 март көнне, Яшьләр үзәгендә “Идел буе яшьләре: проблемалар һәм перспективалар” дип исемләнгән студентларның бөтенроссия фәнни-практик конференциясе булып узды.
Әлмәт муниципаль районы Советы, “ТИСБИ идарә университеты”ның Әлмәт филиалы, Балалар һәм яшьләр эшләре идарәсе берлегендә оештырылган чара заман яшьләрен борчыган, социаль-мәдәни, сәяси, икътисади һәм хокукый проблемаларны чишү юлларын бергәләп эзләү, табуга юнәлдерелгән.

Конференциядә башкарма комитет җитәкчесе урынбасары Алексей Грушин, “ТИСБИ идарә университеты Әлмәт филиалы” директоры Рушания Нәҗметдинова, Әлмәт музыка коллияте директоры, Дәүләт Советы депутаты Гүзәл Еремеева, уку йортының Яр Чаллы филиалы директоры Ирина Комадорова, “ТИСБИ идарә университеты” фәнни-мәгариф кластеры җитәкчесе Рәис Нәҗипов, “АКИБАНК” Әлмәт филиалы директоры Владимир Тишов, төбәктәге башка уку йортларыннан килгән аспирантлар һәм студентлар катнашты.

Район башлыгы исеменнән сәламләп, Алексей Грушин яшьләрнең һәрвакыт авангард, җәмгыятьне хәрәкәткә китерүче көч булуын, проблемаларны күтәреп чыгу белән генә чикләнмичә, аларны хәл итү юлларын тәкъдим итү мөһимлеген билгеләде. Рушания Нәҗметдинова конференциядә республикадан гына түгел, Россия уку йортларыннан да студентлар катнашуын әйтеп узды, фәнни потенциалны арттыруда чараның әһәмияте зур булуын ассызыклады. Пленар утырышта банк директоры Владимир Тишов уку йорты белән ике арадагы хезмәттәшлек үрнәкләре, ЗАГС белгече Галина Картовая район һәм шәһәрдәге демографик ситуация турында сөйләде. Төшке аштан соң конференция аерым секцияләрдә дәвам итте. Студентлар “Җәмгыятьнең социаль-икътисади мәсьәләләре”, “Заманча менеджмент: проблемалар, гипотезалар, тикшеренүләр”, “Мәгълүмати җәмгыять, мәдәният, мәгариф”, “Яшьләрнең мәнфәгатьләрен яклау законнары, хокукый проблемаларны көйләү актуальлелеге”, “Россиядә мәгълүмати технологияләрне үстерү проблемалары һәм перспективалары” дигән секцияләрдә үзләренең фәнни эшләрен якладылар.

Фәрдия Хәсәнова