Спортка фәнни караш

Бүгенге заман студентлары конкурентлыкка сәләтле булудан тыш, яңача фикерли, анализлый белергә дә тиеш. Уку процесыннан кала оештырылган чаралар студентларга бу юнәлештә күп төрле мөмкинлекләр булдыра. 26 март көнне Әлмәт физик культура колледжы базасында Идел буе физик культура һәм спорт академиясе кластерына кергән урта һөнәри уку йорты студентлары катнашында фәнни-гамәли конференция булып узды. Кластерга Казан Олимпия резервы училищесы, Тәтеш педагогия колледжы, Яр Чаллы, Әлмәт физик культура колледжлары керә.

Конференциянең пленар өлеше колледжның актлар залында башланып китте. Уку йортының директоры И.М. Гайфуллин кунакларны һәм катнашучыларны сәламләп, мәркәзебез Казанда узачак Универсиада кысаларында спорт һәм физик культурага зур игътибар бирелүен, урта һөнәри уку йортын тәмамлап чыгучы белгечләргә таләпләрнең зур булуын ассызыклады, конференциядә студентлар яктырткан темаларның бик актуаль булуын билгеләде. Әлмәт физик культура колледжының горурлыгы, чаңгы спорты буенча Россия паралимпия җыелма командасы әгъзасы, Дөнья кубогы иясе Рамил Илалетдинов техникум коллективына олы рәхмәтен әйтеп, чарада катнашучыларга теләкләрен җиткерде. Биредә үк “Идел буе академиясе: мөмкинлекләре һәм перспективалары”, “Универсиада мирасы төбәкнең социаль мәдәни үсешен тәэмин итүче фактор”, Физик культура, спорт һәм ислам: бәйләнеш, үзара йогынтысы” дигән темаларга төрле уку йорты белгечләренең докладлары тыңланды.

Практик өлештә студентлар “Спорт, туризм һәм олимпия хәрәкәтендә тарихи, мәдәни, психолого – педагогик аспектлар”, “Сәламәтләндерү, адаптацияләү физик культурасының медик-биологик аспектлары”, “Төрле квалификацион дәрәҗәдәге спортчылар әзерләү, спорт-туристик һәм рекреацион эшчәнлек процессын камилләштерү” дип исемләнгән секцияләргә бүленеп үзләренң фәнни эшләрен якладылар. Арада танылган спортчы Рамил Илалетдиновның тормышы һәм физик мөмкинлекләренә багышланган фәнни эш тә бар иде. Чара ахырында иң уңышлы дип табылган фәнни эшләр билгеләнеп, җиңүчеләргә истәлекле бүләкләр тапшырылды.

Фәрдия Хәсәнова, “Альметьевский вестник” газетасы