“Президент ярышлары” уеннарының икенче туры старт алды

Сәламәт яшәү рәвешен пропагандалау сәясәте елдан – ел киңрәк колач ала. Укучыларны спортка тарту, тормышка позитив караш формалаштыру, физик хәзерлеген арттыру максатыннан Россия Президенты Указы нигезендә ел саен, ”Президент ярышлары” уздырыла. Агымдагы елда ярышлар Сочида узачак XXII Кышкы олимпия уеннары кысаларында үткәрелә.

Положение буенча “Президент ярышлары” 4 этапта, нигездә мәктәп программасына кертелгән волейбол, баскетбол, мини футбол кебек спорт төрләре буенча уздырыла. Яшь спортчылар декабрь – февраль айларында гомуми белем бирү мәктәпләрендә, март – апрель айларында – муниципаль берәмлекләрдә, май аенда –регионнарда, июнь –августта россия күләмендә көч сынашачак. Бүген, 22 март көнне, ”Президент ярышлары” уеннары кысаларында шәһәрнең 2 нче лицее, 16 нчы, 1 нче һәм 24 нче мәктәп базасында спорт чаралары башланып китте. 2 нче лицейда уеннарны тантаналы рәвештә башкарма комитет җитәкчесе урынбасары В.И.Самойлов ачты. Ул спортчыларны район башлыгы Мәҗит Салихов исеменнән сәламләп, Әлмәт муниципаль районы мәктәбе укучылары арасында спорт ярышларының традицион рәвештә күп еллар дәвамында оештырылуын билгеләп узды, спорт белән шөгыльләнү өчен барлык мөмкинлекләр дә тудырылуын ассызыклады.

Укучыларның спорт ярышларына әзерлеге турында рапорт бирелгәннән соң, республика гимны яңгырады. Лицейдагы ярышларда шәһәрнең 20 нче, 18 нче, 2 нче, 5 нче, 10 нчы, Түбән Мактама 2 нче мәктәбенең югары төркемгә керүче укучылары катнашты. 8 кыз һәм 8 малайдан торган командалар волейбол буенча көч сынаштылар. Уеннар вакытында һәрбер команданың нәтиҗәләре Казанга җибәрелә. Шәһәрнең башка мәктәпләрендә урта һәм кече төркемгә керүчеләр уенына нәтиҗә ясалды. Ярышлар тәмамлангач барлык нәтиҗәләр дә Казанга җибәрелә, очколарга әйләндерелгәннән соң (кем күбрәк очко туплый), региональ турда катнашачак командалар билгеләнә. Бүгенге ярышларда 1996–97 елгы укучылар арасында I урын–5 нче мәктәп, II урын – 20 мәктәп, III урын – 2 нче лицей, 1998–99 елгылар арасында I урын - 16 нчы мәктәп, II урын – 1 нче гимназия, III урын – 21 нче мәктәп, 2000–01 елгылар арасында I урын – 1 нче мәктәп, II урын – 17 нче мәктәп, III урын – 6 нчы мәктәп яулады. Авыл мәктәпләре арасында урыннар түбәндәгечә бүленде. 5 нче сыйныфлар арасында – Яңа Кәшер, 6 нчы сыйныфлар арасында – Елховой, 7 нче сыйныфлар арасында – Кичүчат, 8 нче сыйныфлар арасында – Габдрахман мәктәбе беренчелекне алды.

Фәрдия Хәсәнова,
“Альметьевский вестник” газетасы