Әлмәттә дини оешмалар, милли диаспоралар һәм хокук органнарының үзара хезмәттәшлеге мәсьәләләре буенча түгәрәк өстәл утырышы узды

Дини оешмалар, милли диаспоралар һәм хокук органнарының үзара хезмәттәшлеге – чираттагы түгәрәк өстәл утырышында сүз шул хакта барды.

Православие һәм ислам дине әһелләре ел дәвамында дини агарту, толерантлык юнәлешендә алып барган эшчәнлекләре турында хисап тотты. Алар сүзләренчә, төп конфессияләр җирлектә гыйбадәтләр белән генә чикләнмичә, төрле социаль акцияләр дә оештыра. Атап әйткәндә, Әлмәт районы һәм шәһәре мөхтәсибе Рафикъ Миңнеәхмәтов шундый чараларга тукталып, Анжела Вавиловага ярдәм итүләре, Рамазан аенда сукырлар җәмгыяте вәкилләре өчен ифтар ашлары уздырулары, 500 әр сумнан финанс ярдәме күрсәтүләре, шулай ук Мөслим районы Ташлыяр авылындагы инвалид балалар интернатына даими булышып торулары, атна саен биредә әхлак дәресләре оештырулары турында искәртте. Мәчетләрдә мөхтәсибәт башлангычы белән Коръән укучылар бәйгеләре, ислам нигезләрен өйрәнү курслары уздырыла. Бүгенге көндә төбәктә 36 мәчет эшли, шуларның 33 е кабаттан теркәлү узган.

Түгәрәк өстәл утырышында ассызыкланганча, мөхтәсибәт каршында хәләлне тикшерү буенча комиссия булдырылган. Алар тарафыннан сәүдә нокталарындагы “хәләл” логотибы белән сатылучы товарлар тикшереләчәк. Соңгы вакытта товарны үтемле итү максатында бу төшенчәне урынсыз куллану очраклары да, хәләл юл белән ясалмаганнарына да ярлык тагу фактлары турында ишетелгәли. Мондый җитешсезлекләргә алга таба чик куелачак, диде Рафикъ Миңнеәхмәтов.

Епископ Мефодий соңгы вакытта епархиягә караган төбәкләрдә яңа гыйбадәтханәләр төзелүе, ләкин бүген православие мәдәнияте һәм архитектурасы булган һәйкәлләрне яңадан торгызу зарурилыгы турында да әйтте.

Хисап тотучылар арасында милли диаспоралар вәкилләре дә бар иде. Моңа кадәр җирлектә 4 шундый җәмгыять эшләсә, аларга тагын берәү – дагыстан диаспорасы кушылды.

- Татарстанда мәчетләр һәм чиркәүләр янәшә торсын. Бер генә дин дә сугышырга өйрәтми һәм бер генә пәйгамбәр дә начарлыкка өндәмәгән. Кешене милләтенә карап бүлүгә юл куймаска кирәк. Безнең бүлешер нәрсәбез юк, - диде “Сомониен” таҗик җәмгыяте җитәкчесе Мәрхәбәт Рәхмәтов.

Федераль иминлек хезмәте идарәсенең Әлмәт бүлеге хезмәткәре Андрей Дютин, конфессияләрне дини агарту, экстремизмга каршы профилактика юнәлешендә уртак чаралар уздырырга чакырды. Дингә яңа килүчеләргә, атап әйткәндә неофитларга игътибарлы булу зарурилыгын ассызыклады. Традицион диннәр игътибарыннан секталар да читтә калмаска тиеш. Иманы ялгышканнарны туры юлга күндерү – дин әһелләренең өстенлекле бурычы.

Ләйләгөл Минаева