Пенсияне арттыру мөмкинлегеннән файдаланып калыйк

Пенсиянең лаеклы дәрәҗәсенә ирешү бурычын дәүләт, эш бирүче һәм кешенең үзе ярдәмендә генә хәл итеп була.
Россия Федерациясе Президентының 2008 нче елның 30 нчы апрельдәге 56 нчы ФЗ “Хезмәт пенсиясенең тупланмалы өлешенә өстәмә иминият взнослары һәм пенсия тупланмаларын булдыруга дәүләт ярдәме турында”гы Федераль законга нәкъ менә шушы максат белән кул куелган иде һәм программага керү 2013 елның 1 октябренә кадәр генә дәвам итәчәк. 14 март көнне Әлмәт пенсия фонды җитәкчесе Фая Якупова белән очрашуда сүз шул хакта барды. Идарә җитәкчесе ассызыклап узганча, бу буш вәгъдәләр генә түгел, ә бәлки дәүләт шушы программаны тормышка ашыру өчен биргән реаль акча.
2008 елдан башлап Әлмәт районы һәм шәһәре буенча программада 6 меңнән артык кеше катнаша, шуларның 5 меңе взносларны даими түли.

Эшкә сәләтле теләсә кем ничә яшьтә һәм нинди һөнәр вәкиле булуына карамастан, булачак пенсиясенең күләмен арттыра ала. Моның өчен кеше елына кимендә 2000 сум яки аена 167 сум күләмендә өстәмә иминият взнослары түли башларга һәм аны Россия Пенсия фондындагы шәхси туплану счетына күчерергә тиеш, мондый очракта дәүләт аңа елына 12000 сум чигендә ай саен үзенең мең сумын өстәячәк.

Бу уңайдан кайбер предприятиеләрне үрнәк итеп китерергә мөмкин. Әлмәт торба заводы һәм тагы 5 оешма софинансирование программасында катнашып, үз хезмәткәрләренең булачак пенсияләрен арттыруга лаеклы өлеш кертә.

Әлеге акчаларның кыйммәте кимемәсен һәм алар сезгә өстәмә керем алып килсен дисәгез, конкрет дәүләт яки шәхси идарә итүче компанияне сайлап, бу акчаларны дәүләткә карамаган пенсия фондына күчерә аласыз, алар акчаларны инвестицияләячәк һәм сезгә өстәмә табыш китерәчәк.

Бүгенге көндә уртача дәүләт пенсиясе 9630 сум. Яңа закон буенча киләчәктә минималь пенсия алу өчен дә эш стажы һәм иминият взнослары түләнгән булырга тиеш. Әлеге программа 2008 нче елның 1 октябреннән башланды һәм 5 елга исәпләнгән. Агымдагы елның 1 октябрендә программага керү төгәлләнәчәк. Шуңа күрә дә, санаулы гына калган вакыт аралыгында мәсьәлне хәл итәргә кирәк. Күпләр, программа туктагач, софинансирование бетә дип уйлап ялгышалар. 2013 елның 1 октябренә кадәр керүчеләрнең булачак пенсияләрен дәүләт 10 ел дәвамында акча белән тәэмин итәргә әзер. Программага керергә теләүчеләр Пенсия фондына килеп гариза язарга тиеш. Гаризаларны интернет портал аша да җибәрергә мөмкин. Ныклап уйлагыз да, дәүләт беренче тапкыр биргән мөмкинлектән файдаланып калыгыз.

Фәридә САБАЛЫ