Әлмәт спортчылары яңа үрләр яулый

Әлмәт спортчылары яңадан – яңа үрләр яулый. Шушы көннәрдә генә Әлмәт дәүләт муниципаль хезмәт институты студенты, “Девон” спорт клубында тәрбияләнүче Иван Пустовой бокс буенча студентлар арасында уздырылган Россия чемпионатыннан призлы урын алып кайтты. 5 март көнне башкарма комитет җитәкчесе Марат Гирфанов массакүләм мәгълүмат чаралары вәкилләре катнашында спортчы белән очрашып, түгәрәк остәл артында әңгәмә корды. Марат Нилович зур уңышларга ирешкән спортчы белән таныштырып, җиңүләре белән Әлмәт данын үстерүгә өлеш керткәннәре өчен аларга рәхмәт сүзләрен җиткерде, киләчәктә дә уңышлар теләде.

Иванның тренеры Валерий Рыжих (ул үзе дә Татарстан чемпионы титулына ия боксер) ассызыклап узганча, әлеге абруйлы ярышларда Федерациянең төрле почмакларыннан 182 спортчы катнашкан. Татарстан республикасын тәкъдим иткән 7 спортчының 4 се җиңү белән кайткан. Әлеге абруйлы ярышларның җиңүчеләре апрель аенда Универсиадада ил данын яклап чыгыш ясарга тиешле спортчыларны сайлап алу турына кертеләчәк. Алар арасында безнең Әлмәт егетенең булуы да зур горурлык. 25 февральдән 2 мартка кадәр дәвам иткән ярышларда Иван Пустовойга 69 кг. авырлыктагы көндәшләре белән 4 уенда көч сынаша, шуларның 3 сендә җиңү яулый.

Чыгышы белән ул Казахстан республикасыннан. Нефтьчеләр башкаласына килеп төпләнүенә дә күптән түгел. “Әлмәт бик ошый, туган шәһәрем кебек якын, исәбем - биредә яшәргә, хезмәт итәргә” - ди ул киләчәк планнары белән уртаклашып. Тренировкалар һәм укудан бушаган арада Әлмәтнең яшь спортчылары белән шөгыльләнергә дә өлгерә. 10 һәм 16 яшьтән башлап ике төркем Иван Пустовой җитәкчелегендә бокс серләренә төшенәләр.”Спортның әлеге төрен үзләштергән кеше курыкмыйча үз-үзен яклый ала, бу ир-егетләр өчен аеруча мөһим, спорт дисциплина булдыра, характер тәрбияли, - ди ул боксның өстенлекле якларына тукталып.

Моңа кадәр “Водоканал” җәмгыяте бинасында эшләп килгән “Девон” спорт клубы, үз көчләре белән ремонт ясап күптән түгел генә Балалар һәм яшүсмерләр иҗаты үзәгендәге заманча залларга күчкән. Аның җитәкчесе Валерий Рыжих бокска яшьләрне, бигрәк тә балаларны күбрәк тарту теләге белән яши. Бу максатлардан район һәм шәһәр мәктәпләрендә очрашулар уздыру күздә тотыла. Бокс түгәрәгенә язылырга теләүчеләр Балалар һәм яшүсмерләр иҗаты үзәгендә урнашкан “Девон” спорт клубына мөрәҗәгать итә ала.

Фәрдия Хәсәнова, “Альметьевский вестник” газетасы