Эшмәкәрлеккә юл ачык

Эшмәкәрлек – ил һәм республика икътисадын алга этәрүче, промышленность һәм сәнәгатьнең бүгенге көн таләпләреннән чыгып үсешенә этәргеч бирүче юнәлеш булып тора. Әлмәт муниципаль районында 2013 елның 1 январенә 5362 шәхси эшмәкәр, 1735 урта һәм кече бизнес вәкилләре теркәлгән. Шәһәр һәм районның кече предприятиеләре эшчәнлеге анализыннан күренгәнчә, агымдагы елның 9 аенда 11679 кеше эш урыны белән тәэмин ителгән. Бу узган елның шушы чоры белән чагыштырганда 10 процентка артык. Аларның уртача хезмәт хакы 19,6 сум тәшкил итә. 2012 ел нәтиҗәләре буенча райондагы кече предприятиеләргә икътисади һәм промышленность әйләнешенең 12,6 млрд сумы туры килә, бу 3,5 процент. 8,6 млрд сумлык хезмәт күрсәтелгән һәм товар җитештерелгән. Җирле бюджет формалаштыруда эшмәкәрләрнең өлеше 13,8 процент тәшкил итә.

Район җитәкчелеге урта һәм кече бизнесны үстерү бурычын куя. Әлеге максатларга юнәлдерелгән төрле эш формалары, проектлар шуның бер чагылышы. 27 февраль көнне муниципалитетның кече залында соңгы бер ай эчендә үз эшен ачырга теләк белдергән 4 эшмәкәргә тантаналы төстә свидетельстволар тапшырылды. Чарада башкарма комитет җитәкчесенең икътисад буенча урынбасары Айдар Каюмов, Эшмәкәрлекне үстерү департаменты директоры Михаил Глазков, Сәүдә – сәнәгать палатасы рәисе Рөстәм Латыйпов һәм башкалар катнашты.

Айдар Каюмов очрашуга килгән эшмәкәрләргә мөрәҗәгать итеп, район җитәкчелеге, башкарма комитетның алар өчен һәрвакыт ачык булуын, бизнесны гамәлгә кую, урын белән бәйле сорауларны хәл итүдә икеләнмичә мөрәҗәгать итә алуларын ассызыклап, күпләп һәм ваклап сату юнәлешеннән читләшеп, җитештерү, көнкүреш, торак – коммуналь хезмәт күрсәтү тармакларын үзләштерергә тырышыгыз, хакимият әлеге юнәлешләрне хуплый, дигән фикерне җиткерде.

Эшмәкәрлеккә ярдәм итү департаменты директоры Михаил Глазков бүгенге эшмәкәрләргә дәүләт тарафыннан бирелгән мөмкинлекләр турында сөйләде. Лизинг–гранд, “Социаль проектлар” республика программалары шуларның кайберләре. Рөстәм Латыйпов свидетельство алган эшмәкәрләргә Сәүдә – сәнәгать палатасының хокукый һәм юридик ярдәм күрсәтү мөмкинлекләренә тукталып, эшмәкәрләр һәм власть арасындагы звено булып торуларына басым ясады.

Свидетельствоны беренче булып “Строй–Комплекс” ҖЧҖ җитәкчесе Вячеслав Балов алды. Исәбе - промышленность, торак төзелеше тармагында үз урынын булдыру. “ДиЭль” фирмасы директоры Людмила Гыйльманова шәһәр һәм районда сәхнә костюмнары табу, бигрәк тә аларны тегү проблемасының бик актуаль булуын күздә тотып, әлеге мәсьәләне хәл итүгә алынган. Ателье һәм кибет бергә эшлиячәк. Рөстәм Вәлиев Яңа Кәшер авылында азык– төлек кибете ачарга планлаштыра, Алина Фәтхетдинова балалар киемнәре сату белән шөгыльләнәчәк.

Эшмәкәрләргә уңышлар теләп, район һәм шәһәр икътисадының үсешенә лаеклы өлеш кертүләрен теләделәр.

Фәрдия ХӘСӘНОВА