Сәхнә түрендә – авыл үзешчәннәре

Көннәре хезмәт белән сугарылган авыл халкының тормышын кызыклырак һәм ямьлерәк итү, үзешчән сәнгатьне үстерү максатыннан төрледән – төрле чаралар оештырылып тора. 10 февраль көнне Әлмәт районында 27 ел дәвамында уздырылып, матур бер традициягә әверелгән үзешчән халык иҗаты сәнгать коллективларының отчет концертлары башланды. Авыл башкарма комитеты, мәдәният йорты, китапханә, мәктәп, балалар бакчасы һәм башка учреждениеләрнең бер дулкында эшләвен тәэмин итүче мондый иҗади бәйрәмнәр районның 36 авыл җирлеге, шул исәптән 48 клубта оештырылачак “Чәчәк атсын туган җиребез” дип исемләнгән иҗади бәйрәм программасында Әлмәт шәһәре оешуга –60, Татарстанда нефть табылуга –70 ел тулу, Россия Федерациясе, Татарстан Республикасында тирә–як мохит һәм табигатьне саклау елына багышланган темалар чагылыш табачак.

Узган ялларда иҗат отчеты концертлары 5 авылда булып узды. Беренче булып Клементейкино авылы үзешчәннәре сәхнәгә чыкты. Программа эчтәлекле һәм күп жанрлы булуы белән игътибарны җәлеп итте. “Асамат” фольклор ансамбле репертуарындагы халык иҗаты әсәрләре, иң яшь башкаручыларның вокаль осталыгын жюри гына түгел, тамашачылар да югары бәяләде. Концертны әзерләүдә авыл җирлеге башлыгы Леонид Языков, “Клементейкино” ЯАҖ җитәкчесе И.М.Демьянов зур ярдәм күрсәткән.

Түбән Абдул авылы мәдәният йортында да яңа талантлар үсеп чыккан. “Таң йолдызлары” яшьләр вокаль ансамбле һәм “Умырзая” бию коллективы шундыйлардан.

Дальняя Ивановка авылы үзешчәннәре быелгы чыгышларын яңа тавыш көчәйткеч аппаратуралар ярдәмендә алып бардылар. Авыл җирлеге башлыгы Александр Исаев тырышлыгы белән алынган әлеге төр техника чыгышларның сыйфатлы, концерт программасының тиешле югарылыкта оештырылуында мөһим роль уйнады.

Борискино авылы башкарма комитеты җитәкчесе Җәмил Илалов иҗат отчеты концертын тантаналы төстә үзе ачты. Чыгышлар дәвамында барлык номерлар да эчтәлеккә туры китереп эшләнгән слайдлар белән тулыландырылды. Березовка авылының “Экологик десант” агитбригадасы сәхнә телендә бүгенге көннең актуаль проблемаларын яктыртты.

Иҗат отчеты концертларын Ново-Троицк авылы үзешчәннәре йомгаклады. Татьяна Эгамова башкаруындагы рус халык жырлары, “Сударушка” фольклор төркеменең туган як, туган төбәккә мәхәббәт белән сугарылган җырлары концерт программасының бизәге булды. Балалар коллективлары үзләренең чыгышларын экологик темага багышладылар.
16-17 февраль көннәрендә иҗат концерты отчетлары Бишмунча, Камы- Исмәгыйль, Яңа Нәдер, Яңа Кәшер, Колшәрип, Урман Кәләе, Кәләй һәм Рус Акташы авылларында үткәреләчәк.

Фәрдия Хәсәнов