Бәйге башланды!

Бүген “Нефтьче”мәдәният сараенда «Ел хатын-кызы.Ел ир-егете: хатын–кыз күзлегеннән” республика бәйгенең төбәкара туры башланып китте.“Татарстан хатын-кызлары” республика иҗтимагый оешмасы, ТР Профсоюзлар федерациясе гамәлгә куйган әлеге бәйге быел 16 нчы тапкыр уздырыла.

Бәйгедә көньяк-көнчыгышның 8 районыннан 39 вәкил катнаша. Төрле тармакларда хезмәт куючы иң актив, иң тырыш гүзәл ханымнар һәм көчле ир-егетләр 10 номинация буенча сайлап алыначак. Алар 15 февраль көнне Казанда уздырылачак йомгаклау турында катнашачак.

Бу җаваплы эш “Татэнерго” ААҖнең эшләр идарәсе җитәкчесе, “Татарстан хатын-кызлары” республика иҗтимагый оешмасы әгъзасы Гүзәлия Әхмәдиева җитәкчелегендәге мәртәбәле жюрига тапшырылды.Жюри составына Әлмәт шәһәренең хатын-кызлар Советы рәисе, Дәүләт Советы депутаты, музыка көллияте директоры Гүзәл Еремеева, күрше районнарның башкарма комитет җитәкчесе урынбасарлары, мәдәният идарәсе җитәкчеләре кертелде.

Төбәкара бәйгедә катнашучыларны һәм кунакларны район башлыгы Мәҗит Салихов исеменнән башкарма комитет җитәкчесе урынбасары Николай Богданчиков тәбрикләде. Ул Әлмәт шәһәре оешуга –60, Татарстан нефте табылуга –70 ел тулган юбилей елында чараның биредә уздырылуын нефть башкаласына булган ихтирам дип бәяләде. Сез үз районыгызда иң яхшылары, сез инде җиңүчеләр. Сезнең уңышларыгыз район җитәкчелеге өчен дә зур горурлык, җаваплылык, – диде ул залдагыларга мөрәҗәгать итеп.

Гүзәл Әхмәдиева үзенең чыгышында билгеләп узганча, бүгенге җәмгыятьтә хатын –кызларга алдынгы хезмәткәр, таланатлы педагог, актив җәмәгать эшлеклесе булуларын расларга кирәкми. Шул ук вакытта, гүзәл затларыбыз гаилә корып балалар тәрбияли, тормышыбызга ямь бирә. “Бүгенге бәйрәмдә алар үзләренең уңышлы, укымышлы, алдынгы булу серләре белән уртаклашырлар, мастер – класс күрсәтерләр”– диде ул һәм барлык катнашучыларга да уңышлар теләде.

Бүгенге көн ахырында Казанда узачак йомгаклау турына бару хокукы алучылар билгеле булачак.

Фәрдия Хәсәнова, “Альметьевский вестник”– “Әлмәт хәбәрләре” газетасы