Табигатькә мөкиббән фотограф

Матурлыкны һәркем үзенчә аңлый. Бакчада үсеп утырган алмагачны, бәскә төренгән каеннарны барыбызның да бер төсле итеп күрүе мөмкин түгел. Табигатьнең кабатланмас гүзәллеген тоярга, алай гына да түгел шул мизгелне башкаларга җиткерерлек итеп сурәткә төшерергә аерым бер талант, осталык кирәк. Язмабызның бүгенге герое – фотограф Абушаев Равил Сираҗетдинов шундый осталыкка ия. Бүген, 1 февраль көнне Әлмәт картиналар галереясында ул беренче тапкыр үзенең шәхси күргәзмәсен ачты. Чарада шәһәр ветераннар Советы рәисе урынбасары Марсель Надыров, автор озак еллар хезмәт куеп лаеклы ялга чыккан, “Татнефтегазпереработка” идарәсенең 12 нче цех профсоюз рәисе Евгений Приходько, шәһәрдә яшәүче ветераннар, сәнгать сөючеләр катнашты.

Картиналар күргәзмәсендә фотографның 105 эше урын алган. Ел фасылларының нинди генә гүзәл мизгелләрен чагылдырмаган автор! Журналистларга биргән интервьюсында билгеләп узганча, Равил Абушаев чәчкәләр, кошлар, табигатькә мөкиббән. Әйтергә кирәк, аның кызыксынулары профессионализм дәрәҗәсен күтәрелгән.

Чөнки фотографияләре белән мавыгуы 7 нче сыйныфтан ук башлана. Чыгышы белән ул Мордовия Республикасының Кривозерье авылыннан. 1955 елда Абушаевлар гаиләсе Әлмәт районы Түбән Мактама бистәсенә күчеп кайталар. Армия сафларында хезмәт иткәннән соң берничә ел Мәскәүдә эшли. 1973 елда киредән Әлмәткә кайтып төпләнә. 1983 елдан нефть һәм газ эшкәртү заводында хезмәт куя.

Шәхси күргәзмә ясау идеясен Равил Абушаевка нәкъ менә хезмәттәшләре бирә. “Җыелышларга барганда үземә ошаган фотографияләрен зурайтып ясап, өстәлгә куя идем. Теләге булганнар карый, кызыксына. Нигә мондый матурлыкны бер үзең генә карыйсың, башкаларга да тәкъдим ит диделәр, – ди ул. Шулай итеп, тормыш иптәше белән беренче шәһәркүләм чарага алыналар. Авторның эше белән кызыксынучылар Картиналар галереясенә рәхим итә ала.

Фәрдия Хәсәнова ,
“Альметьевский вестник”– “Әлмәт хәбәрләре” газетасы