Студентлар иң яхшы бизнес– проектлар тәкъдим итә

Әлмәт муниципаль районы бюджетының 13 проценттан артыгы урта һәм кече бизнес вәкилләре тарафыннан тулыландырыла. Агымдагы елда әлеге күрсәткечне 15 процентка кадәр арттыру стратегик бурычларның берсе булып санала. Промышленность үзәкләренең берсе булып саналган нефтьчеләр каласында эшмәкәрлекнең төрле юнәлешләрен сынап карага мөмкинлекләр бар. 28 январь көнне муниципалитетта узган бизнес проектларны яклауга багышланган комиссия утырышында урта һәм югары уку йорты студентлары моны тагы бер кат расладылар.

Бу эшкә яшьләрне тарту, рационализаторлык идеяләрен үстерү, аларны тормышка ашыруга юнәлеш бирү максатыннан районның “Эшмәкәрлекне үстерү департаменты” инде өченче ел рәттән “Иң яхшы бизнес– проект” бәйгесе уздыра. 2013 елда урта һәм югары уку йортларында белем алучы студентлардан 24 эш кабул ителгән. Иң югары балл җыйган 6 эш башкарма комитет җитәкчесенең икътисад буенча урынбасары Айдар Каюмов рәислегендә узган комииссия утырышыда тикшерелде.

Бизнес– проектларын якларга килгән яшьләргә мөрәҗәгать итеп, бәйгедә катнашулары, үзләренең идеяләре, тәкъдимнәре белән кыю рәвештә уртаклашканнары өчен рәхмәт әйтте, киләчәктә дә актив булып, башлаган эшләрен ахырына кадәр җиткерүләрен теләде.

Беренче булып үзенең бизнес – проекты белән АФИЭУиП студенты таныштырды. “Шиннарны үтильләштерү” дип аталган хезмәт әлеге чималны җыеп эшкәртү, барлыкка килгән продукцияне промышленностьтә куллануга нигезләнгән. Проект тормышка ашырылган очракта, экологик һәм икътисадый юнәлешләрдә дә файда булырга тиеш.

Әлмәт физик культура колледжы студентлары жюри хөкеменә социаль характердагы “Мөмкинлекләре чикләнгән затларны гидрориабилитацияләү” бизнес – проектын тәкъдим итте. Алар су эчендә алып барылган физик күнегүләрнең мөмкинлекләре чикләнгән кешеләргә бик нәтиҗәле тәэсир итүен, “Һәркемгә уңайлы мохит” республика программасы кысаларында шәһәрдәге 9 бассейнда махсус төркемнәр ачу эшен оештырырга кирәклеге турында сөйләделәр.

Әлмәт нефть институты студентлары күпчелек промышленность тармагына басым ясаганнар. “Экотерм” энергияне саклау приборлары нигезендә, вентиляцияләү системасын куллану” һәм нефть скважиналарының эш коэффицинетын арттыручы детальләр белән җиһазлау буенча проектлар комиссия әгъзаларында зур кызыксыну уятты. Соңгысы буенча нефть табу скважиналарында сынаулар уздырылган инде, нәтиҗәләр уңай булса да, рәсми рәвештә рөхсәт алынмый торып, аны гамәлдә кулланырга ярамый. Студентлар игътибарыннан авыл хуҗалыгы да читтә калмаган. Мөгезле эре терлек асрау буенча мини –ферма республика һәм федераль программалар ярдәмендә 3 елдан соң үз– үзен аклый башлаячак.

Иң уңышлы дип табылган бизнес – проектлар бәйге шартлары нигезендә 15, 10, 5 мең сум күләмендә премияләр белән билгеләп үтеләчәк. Җиңүчеләрне бүләкләү чарасы киләсе атнага район башлыгы катнашында уздырылыр дип көтелә.

Фәрдия Хәсәнова “Альметьевский вестник”– “Әлмәт хәбәрләре” газетасы