Әлмәт полициясенең хезмәте нәтиҗәле

16 январь көнне Россия эчке эшләр Министрыгының Әлмәт бүлегендә 2012 елның оператив-хезмәт эшчәнлегенә йомгак ясауга багышланган киңәшмә булып узды. Ә Әлмәт полициясенең нәтиҗәләре югары. Коллектив 1 нче категорияле 9 район һәм шәһәр арасында икенче ел рәттән беренче урында.

Ел йомгакларына багышланган киңәшмәдә Әлмәт муниципаль районы башлыгы Мәҗит Салихов, Эчке эшләр бүлеге җитәкчесе, полиция полковнигы Дамир Гарипов, Әлмәт шәһәре прокуроры, юстициянең өлкән советнигы Рафаэль Шакиров, Әлмәт шәһәр суды рәисе Мөхәммәди Таҗиев, Куркынычсызлык федераль хезмәте идарәсенең Әлмәт бүлеге җитәкчесе урынбасары Фәрхәт Миннекәев, бүлек җитәкчеләре һәм хезмәткәрләр катнашты.

Эчке эшләр идарәсенең актлар залында узган җыелыш котлаулар белән башланып китте. Бу көннәрдә генә озак еллар әлеге коллективта эшләп чыккан, “Шәхси батырлык” ордены белән бүләкләнгән Юрий Козловка 55 яшь тулган. Бүлекнең Ветераннар Советы рәисе Рәшит Ярмиев бу легендар шәхеснең хезмәт юлы, күрсәткән батырлыклары турында кыскача гына сөйләгәннән соң, залда утыручы яшьләргә мөрәҗәгать итеп болай диде: “Батырлыкка һәр кайда һәм һәрвакыт урын бар. Илебезгә лаеклы хезмәт итегез. Без – өлкән буын, сезгә киңәшләребез белән һәрвакыт ярдәм итәргә әзер.” Рәсми җыелышның беренче өлеше юбилярга истәлекле бүләкләр тапшыру белән тәмамланды.

«Узган 2012 ел безнең барыбыз өчен дә катлаулы булды, хезмәткәрләр санының кимүе, аларга булган таләпләрнең артуы белән характерланды», -дип ассызыклап узды үзенең чыгышында Әлмәт эчке эшләр идарәсе җитәткчесе урынбасары Рифкать Әхмәтҗанов. Гомумән алганда, узган ел республика полициясе хезмәткәрләре өчен зур сынаулар белән билгеләнә. “Дальный” полиция бүлегендәге вакыйгалар, ТР Эчке эшләр министрлыгына Артем Хохорин килү белән иске проблемаларны яңача хәл итү мөмкинлеге булдырылды. Эшнең зоналарга бүлеп оештырылуы, әлеге админстратив территория өчен җаваплы хезмәткәрнең эшен һәр көн контрольдә тотарга, нәтиҗәләрне күзәтергә мөмкинлек бирә. Мондый эшчәнлек һәрбер участок инспекторына, оперативникка мөмкин кадәр халыкка якынанрак булырга, гражданнар белән тыгыз элемтәдә эшләргә мөмкинлек бирә.

Рифкать Әхмәтҗанов фикеренчә, ел дәвамында бүлектә алып барылган профилактика эшчәнлеге шәһәр һәм райондагы хәлнең тотрыклануына җирлек булып тора. Барлык юнәлешләр буенча да җинаятьләрнең кимүе шул хакта сөйли. Статистик мәгълүматларга күз салсак, узган елның 12 аенда район һәм шәһәрдә 1810 җинаять теркәлгән, бу респулика күрсәткечләреннән 6,8 процентка кимрәк. Аерым җинаять төрләренә дистәләрчә тапкырга кимүе күзәтелә. Бигрәк тә үтеп керү юлы белән фатирларны талау, үтерү, көчләү кебек авыр җинаятьләр кимегән.

Икътисадый өлкәдә 186 җинаять ачыкланган, җәмәгать урыннарында 508 закон бозу теркәлгән. Аларның һәрберсе буенча чаралар күрелгән.

Әлмәт муниципаль районы башлыгы тәртип һәм хокук саклау юнәлешендә полиция хезмәткәрләренең хезмәтен югары бәяләп, аларга олы рәхмәт сүзләрен җиткерде.

“Ел нәтиҗәләре буенча Эчке эшләр идарәсенең Әлмәт бүлеге 1 нче категорияле 9 район һәм шәһәр арасында икенче ел рәттән беренче урынга чыкты. Нефть башкаласы, районыбыздагы бер генә чара да полиция хезмәткәрләре катнашыннан башка узмый. Статистикага күз салсак, Эчке эшләр идарәсендә барлык параметрлар буенча да җинаятьләрнең кимүе күзәтелә. Быел Министрлык һәм “Татнефть” ААҖ ярдәме белән яхшы ремонт ясалды. Биредә эш бик грамоталы оештырылган, башта хезмәткәрләргә яхшы шартлар тудырыла, аннары югары таләпләр куела. Эчке эшләр идарәсе үз алдына куелган бурычларны төгәл үти” - дип билгеләп үтте район башлыгы үзенең чыгышында. Аннары тырышып хезмәт иткән полиция хезмәткәрләренә Совет һәм башкарма комитетның Рәхмәт хатларын тапшырды.

Фәрдия ХӘСӘНОВА, “Әлмәт хәбәрләре” газетасы