Татар теленә өйрәтү on-line мәктәбе проекты аша тормышка ашырыла

Яңа елда дәүләт теле булып саналган татар теленә Татарстанда, шул исәптән чит илләрдә дә караш уңай якка үзгәрер дигән ышаныч бар. Узган елның соңгы эш көнендә ТР Президенты Рөстәм Миңнехановка “Ана теле” татар теленә дистанцион өйрәтү информацион-укыту проекты тәкъдим иттелде.

Рөстәм Миңнеханов фикеренчә, бүген дөньяда якынча 7 миллион татар яши, соңгы халык санын алу буенча Россиядә аларның саны – 5,5 миллион, шуларның якынча 2 миллионы гына Татарстан территориясендә яши. Татар теленә тел буларак, БДБ илләрендә, чит илдә ихтыяҗ бар, дистанцион өйрәнү күп ватандашларга туган телне үзләштерергә мөмкинлек бирәчәк.

Исегезгә төшерик, “Ана теле” татар теленә өйрәтү on-line мәктәбе проекты ТР һәм EF Education First компаниясе белгечләре белән берлектә эшләнелә. Татарстан ягыннан проект эшенә югары квалификацияле филологлар, татар теле укытучылары җәлеп ителгән.

Проект кысаларында башкарылган эшләргә килгәндә, Татарстан ягыннан 26 белгеч, дүрт төркемдә эш алып бара. Бүгенге көндә проект кысаларында 96 дәрес әзерләнгән, 96 видеофильм төшерелгән, 5 меңнән артык аудио ролик яздырылган.

EF Corporate Language Learning Solutions генераль директоры Эдуард Балдаков ассызыклап узганча, on-line мәктәп проектында 9 тел дәрәҗәсе күзалдында тотылган, яхшы җитештерү базасы булдырылган. “Ана теле” программасының тест версиясендә күрсәтелгәнчә, кулланучының системада теркәлүе, аның тел дәрәҗәсен бәяләү һәм инде программада эшләү каралган. “Ана теле” татар теленә өйрәтү on-line мәктәбе проектына тәүлек дәвамында дөньяның төрле җиреннән кереп булачак.

Ф.Хәсәнова