Милли көрәш батырлары бүләкләнде

Кара алтын башкаласы үзенең батыр көрәшчеләре белән лаеклы горурлана ала. Узып баручы 2012 елда милли көрәш буенча Әлмәтнең җыелма командасы республикада беренчелекне алды. Район тормышында зур урын алып торган әлеге вакыйга спортчыларның үзләре өчен дә олы бер бәйрәмгә әверелде. 20 декабрь көнне Яшьләр үзәгендә Татарстанның 64 командасы арасында җиңү яулаган көрәшчеләр командасын бүләкләү тантанасы булды. Чарада Әлмәт муниципаль районы башлыгы Мәҗит Салихов, Татар-башкорт көрәше федерациясе башкарма директоры Равил Хәйруллин, “Татнефть” ААҖ генераль директоры урынбасары Рөстәм Мөхәммәдиев катнашты.

Әлмәт егетләренең җиңүләре – озак еллар дәвамында ихтыр көче, зур тырышлык бәрабәренә ирешелгән биеклек. Бу хакта үзенең тәбрикләүләрендә район башлыгы да әйтеп узды. Мактау грамоталары, Рәхмәт хатлары, премияләр һәм кыйммәтле бүләкләргә Әлмәт данын еракларга тараткан Ильяс Галимов, Рузиль Ганиев, Руслан Нургалиев, Айвар Билалов, Фәнил Мингазов, Рим Синекаев, Рамиль Синекаев, Ильяс Билалов, Марсель Гөзәеров, Рөстәм Мөхәмов, Марсель Вәлиев кебек батырлар лаек булды.

Район һәм шәһәребездә милли көрәшнең үсешенә зур өлеш кертүче, кайчандыр үзе дә спортның әлеге төре белән шөгыльләнгән Мәҗит Салиховның хезмәтләре дә республика җитәкчелеге тарафыннан зур бәягә лаек булды. Район башлыгына ТР Татар-башкорт федерациясе, Авыл хуҗалыгы һәм азык-төлек министры Марат Әхмәтовның Рәхмәт хаты һәм исемле сәгате, Балалар һәм яшьләр эшләре, спорт һәм туризм министрлыгының Мактау грамотасы тапшырылды.

Бүләкләү тантанасында иң яшь көрәшчеләр дә игътибарсыз калмады. Бүгенге көндә әлеге спортны юлдаш итүчеләр саны 500дән артык. Авылларда актив рәвештә көрәш түгәрәкләре оештырыла.

Әлмәт муниципаль районында көрәш 50–60 елларда ныклы үсеш ала. Район батырлары Исхак Лотфуллин, Шамиль Мөхәммәтдинов, Ришат Ханов ул чорларда республикага танылган батырлар булалар. Көрәшнең Әлмәттәге үсешендә ТР Атказанган тренеры Димеев Ильгизәр Салахович күп көч куя. 1979 “Әлмәтнефть” идарәсенең спорт комплексында милли көрәш буенча секцияләр эшли башлый. Яңа буын спортчыларны тәрбияләүдә озак еллар дәвамында өлкән тренер булып эшләүче Салават Йосыповның да хезмәте зур.

“Татнефть” ААҖ башка барлык спорт төрләре белән беррәттән, милли көрәшкә дә игътибарларын киметми. Спортчыларыбызның күбесе нефть табу һәм чыгару предприятиеләрендә эшли. Алар спорт белән шөгыльләнсен, бәйгеләрдә катнашсын өчен барлык мөмкинлекләр дә булдырылган.

2013 елда Әлмәттә уздырылачак герой-шагырь Муса Җәлил исемендәге республика бәйгеләре спортчыларыбызның зур җиңүләрендә тагы бер адым булыр дип ышанып калабыз.

Фәрдия Хәсәнова
“Яшьләр заманы” газетасы