Шәһәрдә Яңа ел утлары кабына

Киләсе Елан елы җиһанга аяк басарга да санаулы гына көннәр калып бара. Быелгы Яңа ел бәйрәмнәрен зур ышаныч, якты өметләр белән көткән халыкка шәһәрнең бизәлеше дә бик мөһим. Шуңа күрә дә, кешеләрнең бәйрәм күтәренкелеге булсын, Әлмәт төсле утлар яктылыгында балкып утырсын өчен һәр оешма, предприятиенең әлеге эштә актив катнашуы кирәк. Нефтьчеләр каласында Яңа елга әзерлек эшләре ноябрь аенда ук башланган иде инде.

Беренче үткәрелгән киңәшмәдә билгеләп үтелгәнчә, 10 декабрьгә кадәр шәһәрне бизәү эшләре төгәлләнергә тиеш булса да, графиктан артта калып эшләүчеләр байтак. Бу җитешсезлекне бетерү максатыннан Башкарма комитет җитәкчесе урынбасарлары һәм журналистлар катнашында даими рәвештә рейдлар үткәрелеп тора.

18 декабрь көнне кичке караңгылыкка чума барган Әлмәт буйлап йөргәндә хакимият карарын кемнең ничек үтәгәнлеген аеруча күзгә ташланды. Җәлил урамы буйлап Шевченкога күтәрелгәндә ӘДМХИ, УПТЖ ППД биналары уртача гына бизәлгән керү урыннары, урам як стеналары күзгә ташлана. Ә менә “Система – Сервис” һәр елдагыча Шевченко урамының күрке булып, ерактан балкып тора. Юл буенда урнашкан “Татнефть”– – АЗС лары кардан, боздан ясалган сыннар, төрле формаларга әверелдерелгән гирляндалары белән күзне камаштыра. Әлеге эшкә бик җаваплы һәм иҗади яын килгәнлекләре күренеп тора.

Эшмәкәр Ипатьев үзенең биек– биек биналарын бизәү турында уйламый да. Аларда бер генә ут, гирлянда да таба алмассың. Биналарын бизәүгә салкын караучылар исемлегенә 15 нче мәктәп, “Казанский Банк”, аптека, шторалар салонынкертергә була. Әйләнмәле юллар боҗрасыннан Ленин урамына борылгач төсле утлар белән балкыган шәһәргә карап күңел күтәрелде. “Яшьлек”, “Көнбатыш капка” микрорайоннарында барлык предприятиеләр дә хакимяит карарына җаваплы караганнар.

Шәһәрнең үзәге “Татнефть”, хакимият, “Әлмәтнефть” биналарында төрле формаларга кертеп ясалган утлар яктылыгы, урамдагы чыршыларның җемелдәүләреннән тагы да яктыра.

Герцен урамына таба юнәлгәч, Ленин урамындагы “Русский Стандарт “банкы, Мегафон кәрәзле элемтә офисы Яңа елга бик начар әзерләнгәннәр. “Сбербанк”ның төп офисы бизәлгән булса да, шәһәр буйлап урнашкан бер генә филиалына да Яңа ел утлары куелмаган. Салым инспекциясендәгеләрнең дә бина бизәргә вакытлары җитми ахрысы. Әлмәтнең Радищев урамы Лас-Вегасны хәтерләтсә, янәшәдәге Чехов урамын төнге караңгылык урап алган, ник бер ут яктыртсын. Совет урамына “Карат” сәүдә йорты, РСУ биналарының заманча, зәвык белән бизәлгән фасадлары, чыршылар ямь өсти.

Тулаем алганда, Яңа елга әзерлек буенча шәһәрдә эш дәвам итә, алга китеш бар дип нәтиҗә ясады Башкарма комитет җитәкчесе В.И.Самойлов. Яңа елга кадәр үз биналарын матурларга теләүчеләргә ике атнага якын вакыт бар әле. Теләк кенә кирәк.

Фәрдия Хәсәнова
“Яшьләр заманы” газетасы