Әлмәтнең яшь көрәшчеләре Елховой авылында узган ярышларда катнашты

Бүген муниципаль районы башлыгы Мәҗит Салихов Елховой авылында узган ярышларда Әлмәтнең яшь көрәшчеләрен сәламләде. Түбән Абдул авылының Бөек Ватан сугышы геройлары истәлегенә багышланган милли көрәш турнирында 9 дан 16 яшькә кадәрге 60 бала катнашты. Безнең районда 50дән артык спорт төре белән шөгыльләнү өчен мөмкинлекләр тудырылган, шулар арасында милли көрәш аерым урын алып тора. Чөнки, көрәш татар халкының гореф–гадәтләрен саклап калу, үстерүгә хезмәт итә. Бүгенге көндә әлеге секцияләрдә 300 дән артык кеше шөгыльләнә, – дип билгеләп үтте ул авыл халкын һәм спортчыларны сәламләгәндә.

Елховой авылындагы көрәш түгәрәге моннан ел ярым элек ӘДМХИ ректоры Ильяс Салахов инициативасы белән оештырыла. Мәктәп бинасында яшь көрәшчеләргә спорт белән шөгыльләнү өчен барлык уңайлыклар да булдырылган. Әлмәт Сабантуйларында 7 тапкыр абсолют батыр калган Ильяс Галимов атна саен бирегә килеп яшьләрне милли көрәш серләренә төшендерә, мастер–класслар оештыра.

Әлмәт лаеклы рәвештә республика, Бөтенроссия күләмендә уздырылган төрле бәйге һәм ярышларның җиңүчесе булган батырлары белән горурлана. Бер атна элек кенә якташыбыз Руслан Нургалиев Казанда узган чемпионат һәм Россия беренчелегендә Россия чемпионы булды. Бәйгедә Россиянең 36 төбәгеннән 245 көрәшче катнашуын исәпкә алсак, беренчелекнең югарылыгын күзаллавы авыр түгел. Ә иң зур җиңү, әлбәттә, –2012 ел нәтиҗәләре буенча Әлмәт җыелма командасының республика күләмендә беренче урынга чыгуы.

Киләсе елга башкалабыз Казанда Бөтендөнья Универсиадасы узачак. Мондый югарылыктагы спорт ярышлары тарихында программага беренче тапкыр кертелгән 5 спорт төре арасында милли көрәш тә бар. Әлмәт муниципаль районында герой–шагыйрь Муса Җәлил истәлегенә багышланган турнир 2013 елда Әлмәт шәһәре оешуга – 60, Татарстан нефте табыла башлауга – 70 ел тулуга багышланган чаралар кысасында оештырылачак.

Лира Сахапова, Әлмәт муниципаль районы башлыгы матбугат үзәге.
Ф.Хәсәнова тәрҗемәсе